Alta demanda de billetes de tren para visitar Ourense en Semana Santa dende Madrid, Barcelona ou Alacant

Para aqueles que teñen previsto achegarse a Ourense en tren nos próximos días, vai ser tarefa complicada se non mercaron a súa viaxe con antelación. Para o vindeiro venres, as portas da semana santa, xa non hai billetes dende Madrid, Barcelona ou Alacante por exemplo. Algúns mesmo decidiron adiantar a súa viaxe.

"Non eliximos Semana Santa porque estaba cheo e viñemos antes".

Completos tamén os trens que chegan o sábado dende Barcelona ou Alacante, para entón xa só quedan asentos nun dos oito trens que chegan dende Madrid. E non está máis fácil a volta, todos os trens, agás un, colgan o cartel de completo.

"Eran cidades que antes estaban desconectadas e agora pola proximidade veñen moito máis a Ourense. Xa só o feito de ter que parar aquí co AVE, pois xa visitan a cidade", explica a guía turística Uxía Nóvoa.

"Somos de Alacante e viñemos no tren, no AVE, estiven buscando os billetes case dous meses antes para poder pillalos".

"Eu xa o tiña comprado dende hai moito, entón xa o tiña asegurado".

A escaseza de billetes súmanse tamén os prezos, que dependendo da data poden ser moi elevados.

"O tren era carísimo, para que teñas unha idea: imos ir a Barcelona no mes de maio, ida e volta, 24 euros o billete polo AVLO, pero o AVLO non chega a Ourense, o tren saíanos moito máis caro que toda a gasolina".

Con todo, os viaxeiros agradecen sobre todo poder aforrar tanto tempo na viaxe.

"Isto para nós é unha marabilla, porque en dúas horas presentámonos en Ourense".

"Moi ben, moi cómodo e moi ben".

Convén din, planificar a viaxe con tempo e non deixar a compra dos billetes para os últimos días.