Alertan do aumento do mercado negro de fármacos
Os máis demandados son os medicamentos para perder peso, como Ozempic, e os potenciadores sexuais
Estas redes están ligadas e usan as mesmas canles que as organizacións do narcotráfico
A oferta é infinita. A demanda, cada vez maior.
"Os que son hipoglicemiantes que están relacionados coa baixada de peso rápido, como o famoso Ozempic, son o 'hit' pero no mercado das falsificacións tamén hai psicótropos e produtos para a disfunción eréctil", explica Braulio González, vicepresidente do Colexio de Farmacéuticos de Lugo.
"Se ben hai uns anos se distribuían a través de empresas, herbolarios ou ximnasios, hoxe case todo é por venta en liña", confirma Xosé Luís Raposo, xefe da Unidade de Delincuencia Organizada da Garda Civil de Lugo.
Solucións rápidas para adelgazar ou potenciadores sexuais a golpe de clic que, aínda no caso de que funcionen, poden saír demasiado caros.
"Teñen o problema de que non teñen o control nin teñen ningún tipo de seguridade, nin información sobre o produto que se vai mercar. Teñen riscos que fan que non todo o mundo debera acceder a eles, sobre todo, problemas cardíacos", advirte Braulio Gómez.
Un dos últimos alixos apareceu, case de casualidade, en Becerreá. A Garda Civil detivo un individuo que levaba o coche cargado de maletas con medicamentos, a maioría con efectos afrodisíacos. A procedencia, a saber!
"A maior parte desa medicación viña de Colombia e algúns foran retirados e prohibidos polas autoridades de Colombia, polo que é posible que parte do excedente viñera para España. Outros son falsificacións que veñen de países asiáticos e mesmo de África e hai outros que teñen compoñentes moi opacos", engade o xefe da EDOA.
Detrás, organizacións ligadas ao narcotráfico.
"Estanse usando as mesmas canles de introdución de drogas dos narcos. Veñen traer fármacos dos países do leste e levan de aquí a cocaína", constata Raposo.
O mercado negro dos medicamentos medra a ritmo de vertixe porque os beneficios son moi altos e as penas moito máis baixas que as da droga.
Calcúlase que pode mover uns 300.000 millóns de euros ao ano.
"Na operación Pangea, clausuráronse ata 139.000 webs e incautaron preto de 23 millóns de dólares en efectivo", incide o xefe da EDOA de Lugo.
Un enorme She In de fármacos, cuns produtos falsificados, outros caducados, e todos eles sen o máis mínimo control, o que vén sendo unha bomba!
