Activada a alerta laranxa en todo o litoral galego para este mércores

A Xunta activou para este mércores a alerta laranxa por temporal costeiro en todo o litoral galego, polo que se suspende a actividade deportiva federada no mar en todos os municipios afectados.

Segundo a Axencia Estatal de Meteoroloxía (Aemet), o fenómeno meteorolóxico adverso estará activo desde primeira hora da mañá no noroeste da Coruña, estenderase ao mediodía ao resto desta provincia e á de Lugo e, xa pola tarde, á de Pontevedra.

Espera mar combinado do oeste ou noroeste con ondas de ata sete metros e vento do oeste ou suroeste de forza oito, que ocasionalmente no noroeste da Coruña pode ser de ata forza nove.

Para garantir a seguridade dos bens e as persoas, a Dirección xeral de Emerxencias e Interior da Consellería de Presidencia informou da situación a través do 112 Galicia aos concellos das provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros.

Ademais, anunciou a suspensión da actividade deportiva federada e do programa Xogade no mar nos concellos afectados, que poden consultarse na web Deporte Galego.

A Xunta lembra a importancia de manterse afastado da liña de costa, isto é, diques e paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.