Acepta seis anos e medio de prisión por agredir sexualmente a filla da súa afillada en Viveiro
No momento das agresións a pequena tiña 9 anos
O home, que estaba en prisión provisional, logrou rebaixar á metade a condena tras confesar o sucedido e indemnizar a vítima
Aboaralle 35.000 euros e terá que permanecer afastado dela durante 16 anos
Vista de conformidade celebrada na Audiencia Provincial (Europa Press)
Un veciño de Viveiro de mediana idade aceptou este luns unha pena de seis anos e seis meses de prisión por agredir sexualmente a filla da súa afillada en varias ocasións. Ademais, deberá indemnizala con 35.000 euros por danos morais.
Así o acordaron a acusación e a defensa antes da sesión prevista na Audiencia Provincial. O home acudiu escoltado polos axentes, xa que está en prisión provisional desde o momento dos feitos, en xuño de 2022.
A Fiscalía pedía nun primeiro momento unha pena de 12 anos de prisión, pero aceptou rebaixar a mesma ao facer valer as atenuantes de reparación do dano e tamén o de confesión.
No momento das agresións a pequena tiña 9 anos
Os feitos tiveron lugar en 2022 cando a menor, que tiña 9 anos naquel momento, foi convidada polo acusado para probar roupa na casa familiar. Obrigouna a espirse, tocoulle os seus partes íntimas e botouse sobre ela mentres a nena choraba. En datas seguintes volveu agredila en varias ocasións, chegando a meterse no baño cando se estaba duchando.
Case catro anos despois do sucedido, o home recoñeceu os feitos. Aceptou cumprir unha pena de seis anos e seis meses de prisión e permanecer afastado da súa vítima durante un período de 16 anos. Ademais, permanecerá outros 10 anos en liberdade vixiada.
O home xa aboou á vítima 21.000 euros en concepto de dano moral. Os 14.000 euros restantes irallos aboando a razón de 150 euros cada mes.
