Accións vandálicas en Marín deixan 7 colectores queimados de madrugada

Os transeúntes da rúa Jaime Janer de Marín encontráronse esta mañá cos restos de tres incendios de colectores de lixo. A súa pegada era esta, coa beirarrúa e a calzada danadas e os edicios de arredor danados. María José viviuno e mesmo rexistrou o que pasaba na beirarrúa baixo o edificio en que reside.

María José Infante gravou imaxes despois de dar alerta do incendio e conta: "Arredor das dúas e media da mañá percibín o cheiro a queimado. Asomeime á ventá e vin o incendio. Chamei o 112 e dixéronme que ían activar as alarmas".

Ao lugar desprazáronse efectivos da Policía Local e da Nacional e dos bombeiros. Uns douscentos metros rúa arriba tiña lugar outro sinistro similar. Un dos moitos grupos de 4 colectores dos distintos tipos de residuos quedaba arrasado por outro incendio. Neste caso lapas e fume tamén afectaron o edificio máis próximo. Un operario da panadería do lado viviu de preto o sinistro, como nos conta a dona do negocio.

"Pola ventá viu unha lapa moi grande e achegouse aquí, e viu que estaban ardendo e cando empezou a traballar xa viñeron os bombeiros", di Claudia Sánchez, propietaria da panadería Rías Baixas.

Sete colectores e o seu contido queimados, danos considerables polo lume e o fume na vía pública e tamén nas fachadas, cristaleiras e persianas dos edificios próximos son os danos visibles dos incendiarios.

"Afectou Internet, porque se queimaron os cables. Esta mañá chamei a compañía e dixéronme que ían vir arranxalo", precisa a testemuña dun dos incendios.

A Policía Local investiga os feitos, mentres veciños de vila de Marín ao ver isto lembran que recentemente foi un coche o que apareceu ardendo preto de aquí, e hai aproximadamente un mes, en Canto de Areas, tamén preto, foron dous os coches queimados.