Ábrese novo xuízo a Granados polo caso Púnica no que se enfronta a 42 anos de cadea

O xuíz da Audiencia Nacional Antonio Piña abriu un novo xuízo oral do caso Púnica contra o exconselleirodo PP da Comunidade de Madrid Francisco Granados e outras 40 persoas máis por supostas irregularidades, entre 2003 e 2011, nas adxudicacións de solo público para construír vivendas e nas obras de liñas de Metro.

Piña ditou o pasado mércores un auto de apertura de xuízo oral, ao que tivo acceso EFE, contra Granados, xusto nas mesma semanas nas que o exconselleiro de Presidencia, Xustiza e Interior e ex secretario xeral do PP madrileño se sentou no banco da Audiencia por outra peza do caso Púnica.

No último xuízo, Granados negou amaños en adxudicacións 

Na súa declaración nese xuízo, Granados negou que organizase amaños en adxudicacións municipais e do Goberno rexional a cambio de dádivas e que ordenase que actos do PP fosen pagados por concellos con cargo a contratos de servizos da empresa dun amigo seu.

A peza para a que se abriu xuízo, a número 8 da Púnica, acusa a Granados, ao que fóra o seu socio David Marjaliza e ao exconselleiro de OHL Javier López Madrid por supostas irregularidades entre 2003 e 2011 nas adxudicacións de solo público para construír vivendas, así como nas obras de dúas liñas de Metro da capital e do metro lixeiro da localidade de Boadilla.

Xulgaranse as supostas irregularidades de Granados durante a súa xestión como conselleiro, acusado, como a maioría das persoas que se sentarán no banco, dos delitos de prevaricación administrativa, suborno, tráfico de influencias, malversación, fraude e falsidade documental.

Por todos eses delitos, a Fiscalía pide para Granados 42 anos de cárcere.