A Audiencia Nacional emite unha orde internacional para deter a Rodolfo Reyes, accionista de Plus Ultra

O xuíz da Audiencia Nacional José Luis Calama emitiu unha orde internacional para deter a Rodolfo Reyes, principal accionista da compañía Plus Ultra polos delitos de apropiación indebida, tráfico de influencias, pertenza a organización criminal e branqueo de capitais.

Segundo figura na orde, en 2017 a titularidade real e xestión de Plus Ultra pasou a mans Rodolfo Reyes e da súa esposa, María Aurora López, para a que o xuíz tamén emitiu unha orde internacional de detención polos mesmos delitos.

Así mesmo, Calama ordenou a detención de Simon Leendert Verhaoeven, quen xunto con Luis Felioe Baca Arbulu, xa detido na illa caribeña de Aruba, xestionaba unha organización criminal dedicada ao branqueo de capitais, da que Reyes era, entre outros, "presunto cliente".

O xuíz lembra que en marzo de 2021 a compañía recibiu do Estado español unha axuda de 53 millóns de euros. Segundo os indicios do procedemento, Reyes e outros xestores de Plus ultra "idearon un presunto plan para apropiarse desas cantidades de diñeiro 'limpo', que foi destinado en parte e mediante transferencias inmediatas a sociedades instrumentais da rede de branqueo, da que presuntamente forma parte Reyes".

Ademais, o xuíz cre que tamén se destinaron grandes cantidades de diñeiro a entidades vinculadas con Reyes en Panamá, Porto Rico e República Dominicana.

Xa concedida a axuda, Reys "ordenou presuntamente" que algunhas das cantidades recibidas do Gobierno español fosen transferidas inmediatamente das contas bancarias de Plus ultra en España a tres sociedades instrumentais, "realizándose transferencias a contas bancarias opacas en Xibraltar, Suíza, Montenegro, Reino Unido e Isla Mauricio".

En canto á detención en Aruba de Luis Felipe Baca, o seu defensa púxose a disposición do xuíz para colaborar na investigación e sinalou nun escrito a Calama que o seu cliente non se opoñerá á extradición