Abre o prazo para pedir o Aval Mozo, que cobre o 20 % da hipoteca de primeira vivenda a menores de 36 anos

A conselleira de Vivenda e Planificación de Infraestruturas, María Martínez Allegue, anunciou este venres en Ferrol a apertura do prazo para solicitar o Aval Mozo, unha liña de axudas da Xunta de Galicia destinada a facilitar a emancipación dos menores de 36 anos mediante a cobertura do 20 % do préstamo hipotecario.

Durante unha visita ao novo fogar de Susana e David, unha moza parella que adquiriu a súa primeira vivenda grazas a este programa, a conselleira detallou que a convocatoria conta cunha consignación de 5 millóns de euros.

"Normalmente as entidades financeiras avalan ata un 80 %; nós avalamos o 20 % restante para que os mozos teñan máis facilidades", explicou Martínez Allegue. A responsable de Vivenda destacou a firma de convenios con entidades como Abanca, Caixa Rural, Banco Sabadell e Unicaja para a xestión destes avais. Ademais, subliñou que esta medida é compatible con outras liñas de subvención que a Xunta convocará este mesmo trimestre, como as axudas para a compra de vivenda protexida ou en centros históricos, que poden alcanzar os 20.000 euros.

Esixencia ao Goberno central

Martínez Allegue aproveitou a visita ao barrio de Canido, para lanzar unha dura crítica á administración estatal.

"Esiximos ao Goberno central responsabilidade. O Plan Estatal de Vivenda debería estar operativo desde o 1 de xaneiro de 2026 e aínda non sabemos nada", denunciou a conselleira, instando á súa aprobación inmediata para que as comunidades autónomas poidan activar os fondos dependentes do Estado.

En contraste, defendeu que a Xunta xa ten en marcha as súas liñas propias, como o programa Fogar Vivo, as axudas para reformas en concellos de menos de 5.000 habitantes e o mencionado Aval Mozo. A preguntas dos medios sobre o desenvolvemento urbanístico na zona de O Bertón (Ferrol), a conselleira ratificou o compromiso da Xunta coa vivenda pública.

Actualmente, atópanse en execución dous proxectos que suman 24 vivendas, mentres que outros tres están en fase de licitación.

"O noso reto é que no ano 2028 teñamos 4.000 novas vivendas de promoción pública distribuídas por toda Galicia", concluíu Martínez Allegue, reafirmando que Ferrol será unha peza crave nesta estratexia habitacional.