Cuba confirma "conversas" con representantes dos Estados Unidos

O Partido Comunista de Cuba anunciou este venres que representantes do Goberno da illa "sostiveron recentemente conversacións con representantes do Goberno dos Estados Unidos".

"Dirixidos polo xeneral de Exército Raúl Castro Ruz como líder da Revolución e polo Primeiro Secretario do Comité Central do Partido Comunista e Presidente da República, Miguel Díaz-Canel Bermúdez -e en acción colexiada coas máximas estruturas do Partido, do Estado, e do Goberno-, funcionarios cubanos sostiveron recentemente conversacións con representantes do Goberno dos Estados Unidos", sinala o comunicado, difundido en redes sociais.

O propósito destas conversacións é, "en primeiro lugar, identificar cales son os problemas bilaterais que necesitan unha solución", indicou o presidente do país Miguel Díaz-Canel pola súa banda nunha mensaxe gravada. 

Preténdese "determinar a disposición de ambas as partes de concretar accións en beneficio dos pobos de ambos os países" e "identificar áreas de cooperación para enfrontar as ameazas e garantir a paz e seguridade de ambas as nacións" e tamén "da rexión de América Latina e o Caribe".

"Trátase dun tema que se desenvolve como parte dun proceso moi sensible que se conduce con seriedade e responsabilidade porque afecta os vínculos bilaterais entre as dúas nacións e demanda enormes e arduos esforzos para atopar solución e crear espazos de entendemento que nos permitan avanzar e afastarnos da confrontación", afirmou Díaz-Canel.

O presidente cubano agregou que nestes "intercambios", a parte cubana expresou "a vontade" de que se realicen "sobre bases de igualdade e respecto aos sistemas políticos de ambos os estados, á soberanía e a autodeterminación dos nosos gobernos".

Washington elevou nos últimos meses a presión sobre Cuba bloqueando a entrada de importacións de petróleo á illa, que tan só produce un terzo do cru para satisfacer as súas necesidades enerxéticas.

O presidente dos EUA, Donald Trump, asegurara en varias ocasións durante as últimas semanas que representantes do seu Executivo estaban a manter contactos con autoridades cubanas.

A Habana negou en varias ocasións estas conversas, pero deixou de facelo nas últimas semanas.

Este xoves o Goberno cubano anunciou a excarceración de 51 presos despois de manter contactos co Vaticano. O comunicado do Ministerio de Relacións Exteriores sobre esta decisión non facía ningunha mención aos Estados Unidos.