Abre o prazo para pedir as bolsas da Fundación Amancio Ortega para facer Bacharelato nos EUA e no Canadá

A Fundación Amancio Ortega abre este mércores, 2 de setembro, o prazo de inscrición para a edición 2027-2028 do seu programa de bolsas para estudar Bacharelato no Canadá e Estados Unidos. Tal e como explica a entidade en nota de prensa, esta nova edición contará con 500 prazas e está dirixida a estudantes de 4.º da ESO de centros educativos de España, 90 das cales están reservadas a estudantes de Galicia.

O prazo de presentación de solicitudes abre este mércores ás 13:00 horas e permanecerá aberto ata o 23 de setembro a través da páxina web becas.faortega.org.

A bolsa cobre todos os servizos necesarios para realizar un curso escolar no estranxeiro: aloxamento e manutención nunha familia local anfitrioa, escolarización, viaxe, seguro médico e de accidentes, formación previa ao comezo do curso e apoio continuado durante a estancia.

Igualmente, toda a información sobre o Programa de Bolsas da Fundación Amancio Ortega está dispoñible na páxina web oficial e os interesados tamén dispoñen dun correo electrónico (info@becas.faortega.org) e dun teléfono de atención gratuíto (900 103 651) para consultar calquera tipo de dúbida.