Trump remata a xuntanza co seu equipo de seguridade sen un acordo sobre Irán

A xuntanza que o presidente dos Estados Unidos, Donald Trump, mantivo este venres na Casa Branca co seu equipo de seguridade para tomar unha "decisión final" sobre Irán concluíu sen acordo, segundo informa o diario The New York Times.

A reunión durou preto de dúas horas na sala de crise, pero o presidente non chegou a ningunha decisión que poña fin á guerra, explicou ao xornal un alto cargo da Administración que falou baixo condición de anonimato.

O Goberno estadounidense cre estar preto dun trato, pero aínda quedan certos asuntos por debater, entre eles, o desbloqueo de fondos iranianos, agrega o medio.

Trump anunciara a convocatoria deste encontro na Casa Branca "para tomar unha decisión final" sobre Irán.

Nunha publicación na rede Truth Social, Trump subliñou que a República Islámica debe renunciar a desenvolver unha arma nuclear e reabrir de inmediato o estreito de Ormuz, que mantén bloqueado en represalia pola ofensiva estadounidense-israelí.

Washington anunciou o xoves que os seus negociadores alcanzaron un preacordo con Irán que está pendente da aprobación final de Trump. Porén, Teherán negou ter pechar dito trato.

Trump en Maryland esta semana. REUTERS/Kylie Cooper

Reservas suficientes

Pola súa banda, o secretario de Guerra dos EUA, Pete Hegseth, subliñou este sábado que Donald Trump, "é paciente na procura dun grande acordo con Irán".

"Tiven a oportunidade de falar co presidente Trump esta mañá, e quixo que reiterase o paciente que é", dixo durante a súa intervención no Diálogo Shangri-La de Singapura, o foro de Seguridade anual máis importante de Asia.

O xefe do Pentágono asegurou que os Estados Unidos están nun "bo lugar" e que teñen munición dabondo para continuar o conflito.

"Temos reservas (de armas) máis que suficiente", asegurou Hegseth.