O Goberno asegura que o CNI non alertou da crise migratoria en Ceuta

O Goberno afirma que ningún informe do Centro Nacional de Intelixencia (CNI) alertou da magnitude da crise vivida en Ceuta pola entrada masiva de persoas procedentes de Marrocos; unha afirmación que foi acollida con dúbidas polo PP tras redobrar as súas críticas e esixir explicacións no Parlamento.

Varios ministros referíronse á situación en Ceuta, que levou ao presidente do Goberno, Pedro Sánchez, a enviar unha carta ás institucións europeas e foi respondida este luns pola presidenta da Comisión, Ursula von der Leyen, destacando a "eficacia e eficiencia" da xestión por parte de España e Marrocos.

Fontes do Goberno resaltaron ese recoñecemento da xestión da crise, que será analizada este martes polos ministros de Interior da UE nunha reunión que pedira Sánchez na súa carta a Bruxelas.

Feijóo dubida que non se soubese que ía haber unha "ocupación inmediata"

Ante a magnitude desa crise, o líder do PP, Alberto Núñez Feijóo, nunha entrevista en Telecinco, puxo en dúbida que os servizos de intelixencia españois descoñecesen que ía haber "unha ocupación inmediata".

"Non me creo que unha masa de 60.000 ou 70.000 persoas pasase desapercibida", sinalou Feijóo.

O Goberno nega informes e Robles defende o traballo do CNI  

Ao respecto, a portavoz do Goberno, Elma Saiz, noutra entrevista en Televisión Española, negou a existencia de calquera informe do CNI que advertise da magnitude da entrada masiva de persoas desde Marrocos.

Pola súa banda, a ministra de Defensa, Margarita Robles, nunha visita oficial á base aérea de Zaragoza e preguntada pola posibilidade de que o CNI avisase a Interior, eludiu responder de forma directa.

Robles limitouse a destacar que os profesionais do CNI, o Centro de Intelixencia das Forzas Armadas (CIFAS) e os servizos de información da Policía Nacional e a Garda Civil realizan "un traballo excepcional", polo que rexeitou entrar nun debate sobre a súa actuación.

Elma Saiz puxo o acento na resposta dada por España e Marrocos, sen cuxa colaboración dixo que sería imposible actuar da forma en que se fixo para intentar recobrar a normalidade.

Vai regresar a Marrocos "ata a última persoa" que entrou ilegalmente

Na mesma liña, o ministro de Asuntos Exteriores, José Manuel Albares, destacou a colaboración que prestou Rabat desde o primeiro momento para "minimizar" a crise, e coa súa axuda -asegurou- vai regresar a Marrocos "ata a última persoa" que entrou ilegalmente.

Ao exporlle nunha entrevista en TVE se Marrocos é un socio fiable, respondeu que se remite "aos feitos", e puxo o foco do sucedido "nunha sincronización da internacional reaccionaria que, con moita rapidez, saíu a amplificar o que estaba a ocorrer" e a difundir "mentiras e falsas noticias" sobre a integridade do espazo Schengen.

​​​​Pola súa banda, Margarita Robles reclamou ás autoridades marroquís que investiguen que ocorreu e quen estivo detrás dos movementos organizados a través das redes para que quen "o consentira ou tolerado", asuma as súas responsabilidades.

Tamén reprochou que se utilice a menores e a outras persoas, "botándolles á morte" mediante enganos difundidos nas redes sociais.O PP di que

Sánchez é o responsable, segundo Tellado 

O secretario xeral do PP, Miguel Tellado, que coincidiu con Feijóo en poñer en cuestión que os servizos de intelixencia españois non tivesen información da "marea humana" que se dirixía a Ceuta, sinalou a Sánchez como "responsable principal" da "gran invasión" e reprochoulle que estea xa de vacacións.

Tras esixir en rolda de prensa que se aclare "que fallou na cooperación con Marrocos", defendeu a ofensiva parlamentaria que lanzou o seu partido no Congreso e o Senado para lograr esa aclaración.

Ademáis de pedir que se tramite de forma inmediata a súa proposta de reforma da lei de estranxeiría presentada en xullo, o PP rexistrou unha batería de preguntas nas dúas cámaras.

Mentres, a portavoz de Vox no Congreso, Pepa Millán, asegurou que Ceuta e Melilla seguen "igual de vendidas ante Marrocos", o coordinador federal de EU, Antonio Maíllo, defendeu que o Goberno chame a consultas á embaixadora marroquí.