A Xunta volve permitir as queimas agrícolas e forestais a partir do luns
As persoas interesadas en queimar residuos agrícolas deben informar con dous días de antelación
O Goberno galego lembra que os fortes ventos e as altas temperaturas poden invalidar os permisos
A consellería do Medio Rural anuncia a reanudación dos permisos para queimas de restos agrícolas e forestais a partir deste luns, 2 de novembro, tras dar por finalizada a campaña de alto risco de incendios.
Nun comunicado, o Goberno galego sinala que as persoas interesadas en facer queimas agrícolas deben informar con polo menos dous días de antelación e sinalar se os restos proceden de explotacións.
Para as forestais, é preciso contar cunha autorización administrativa. No entanto, en ambos os dous casos a Xunta advirte de que poderán deixar de ter validez en caso de fortes ventos ou altas temperaturas.
As xestións pódense realizar a través dunha web específica habilitada pola administración autonómica ou mediante unha chamada ao teléfono 012.
