A Xunta usará a plataforma Telea para crear unha rede de apoio para deixar de fumar

O Goberno galego poñerá en marcha unha rede de apoio para deixar de fumar que contará co seguimento dos profesionais sanitarios autonómicos contra o tabaquismo por medio da plataforma Telea, anunciou o conselleiro de Sanidade, Julio García Comesaña.

O conselleiro participou este mércores na presentación do Plan Inspira Saúde en Galicia 2023-2027, acompañado pola directora xeral de Saúde Pública, Carmen Durán, e polo director xeral de Asistencia Sanitaria, Jorge Aboal, entre outros directivos do seu equipo.

Segundo lembrou García Comesaña, o obxectivo deste plan é reducir a prevalencia do consumo de tabaco diario na poboación adulta por baixo do 15 % en 2027, e que ese limiar sexa aínda menor, "por baixo do 5 %", entre adolescentes.

Durante a súa intervención, o responsable autonómico de Sanidade apuntou que o seu departamento elaborará un perfil epidemiolóxico que defina os determinantes que se relacionan cun alto risco de padecer enfermidades relacionadas co tabaquismo.

Ademais, destacou o programa piloto de diagnóstico precoz de cancro de pulmón, así como a detección precoz doutras enfermidades provocadas polo consumo de tabaco, como a EPOC ou as enfermidades cardiovasculares.

Segundo García Comesaña, a Xunta está determinada a usar ferramentas de intelixencia artificial para estratificar o risco do paciente de padecer algunha destas enfermidades.

Entre outras iniciativas paralelas, para incidir na concienciación, establecerase o 31 de outubro como Día Galego sen Tabaco, e crearase a Rede Cidadá Inspira Saúde para a promoción dunha vida sen tabaco.

O plan presentado este mércores tamén prevé o tratamento "ao mesmo nivel" do tabaco convencional e do dispositivos tipo vapeadores ou cigarros electrónicos.

Tamén está prevista a ampliación de máis espazos sen fume ao aire libre, non só praias e parques, como na actualidade, senón campos de fútbol, canchas de baloncesto, piscinas descubertas e mesmo campus universitarios.