A Xunta recorre ante o Constitucional o imposto ás grandes fortunas do Goberno

A Xunta de Galicia acordou este xoves a presentación dun recurso ante o Tribunal Constitucional contra a lei estatal que establece o imposto ás grandes fortunas por considerar que vulnera a autonomía financeira da comunidade galega.

Trátase dun recurso de inconstitucionalidade xa anunciado desde o ano pasado, e que agora se concreta, contra a Lei 38/2022, do 27 de decembro, pola que se crea o imposto temporal de solidariedade das grandes fortunas que, segundo a Xunta, é unha "clarísima vulneración" da autonomía financeira de Galicia en materia de tributos cedidos.

O presidente da Xunta, Alfonso Rueda, explicou que a Administración autonómica ten "plenas competencias" nesta materia para lexislar sobre o imposto de patrimonio e o novo imposto estatal supón "anular e desactivar" calquera bonificación que poida aprobar a comunidade.

Por tanto, o Goberno galego considera que é "un ataque directo" ao principio de autonomía fiscal nos tributos cedidos, e este é o "motivo principal" para a interposición dun recurso de inconstitucionalidade.