A Xunta di que a planificación eléctrica do Goberno saca a Lugo do mapa industrial e ratifica a exclusión de Altri

O Goberno expón na súa proposta inicial de planificación da electricidade en Galicia co horizonte do 2030. O secretario de Estado de Enerxía, Joan Groizard, reuniuse este martes coa conselleira de Economía e Industria, María Jesús Lorenzana, para acordar esta planificación eléctrica.

Un encontro en que participaron técnicos do Goberno autonómico, da Secretaría de Estado de Enerxía e do Operador do Sistema. Tras a reunión e nun comunicado remitido aos medios, o Goberno asegurou que ambas administracións coincidiron na oportunidade que representa este novo ciclo de planificación.

Ademais, sinalou que tras o empuxe á integración renovable que propiciou a vixente Planificación 2021-2026, e a competitividade de prezos obtida grazas a este desenvolvemento, a nova proposta oriéntase a facilitar a conexión de nova demanda, co obxecto de apoiar a descarbonización da industria, consolidar novos proxectos con elevados beneficios sociais, promover a vertebración territorial e, en definitiva, facilitar a xeración de oportunidades de valor ligadas á transición enerxética.

Nesta liña, segundo o Executivo estatal, Xunta e Goberno analizaron as grandes liñas da proposta inicial, valorando que contemple, de partida, actuacións relevantes dirixidas a asegurar a descarbonización e o desenvolvemento en Galicia, tanto en rede de transporte como en rede de distribución, estimulando o tecido produtivo da rexión. Ao final da década, o Executivo estatal estima que a capacidade adicional para que as redes galegas atendan novos consumos practicamente duplicará o pico de demanda rexistrado o ano pasado, de 2,2 GW.

Deste xeito, a proposta inicial de planificación prevé reforzos no norte do territorio para materializar novos proxectos industriais, especialmente ao redor das áreas estratéxicas da Coruña e As Pontes; terá papel destacado a produción de hidróxeno verde, con bos exemplos nas zonas de transición xusta. O Goberno sinalou que tamén se atenderán as novas necesidades de descarbonización de industrias xa establecidas e o crecemento do ferrocarril.

"O reforzo das infraestruturas eléctricas -exponse máis dun centenar de novas posicións e actuacións nunha trintena de subestacións- igualmente propiciará a mellor integración no sistema da xeración renovable, sobre todo eólica, e o almacenamento, con novo bombeo hidroeléctrico", apunta o Executivo estatal.

O Goberno sinalou que a proposta inicial de Planificación con horizonte 2030 elaborouse seguindo criterios técnicos en base ás achegas presentadas na fase de propostas, así como as prioridades do Executivo galego.

O documento someterase a consulta pública e, en paralelo, tramitarase a súa avaliación ambiental estratéxica, tamén aberta a participación. Unha vez recollidas as contribucións na fase de consultas públicas, analizarase a viabilidade física, técnica e ambiental das conxunto propostas presentadas. O resultado desta segunda análise técnica será obxecto de informe por parte da Comisión Nacional dos Mercados e a Competencia, que analiza o cumprimento dos criterios de sustentabilidade económico-financeira.

Sobre as súas conclusións, elaborarase o documento consolidado e a declaración ambiental estratéxica, que se presentarán no Congreso dos Deputados antes da súa aprobación por parte do Consello de Ministros. 

A Xunta, á espera de coñecer o borrador completo, dixo, "en Galicia" pódese dicir que están "razoablemente satisfeitos" co resultado da reunión para unha boa parte do territorio e, en concreto, para tres provincias que son A Coruña, Pontevedra e Ourense, onde "se reforzan as distintas posicións e as distintas zonas que foron solicitadas pola Xunta practicamente na súa totalidade".

Estamos satisfeitos de que toda a zona da cidade da Coruña e a Autoridade Portuaria, xunto coa zona de Ferrol vaia ser reforzada, e de que tamén se poida dar saída á enerxía producida pola maior parte das centrais renovables da zona de Ourense, así como polos reforzos para as zonas de transición xusta, As Pontes e Meirama", sostivo.

Con todo, mostrou a súa "tristeza" por que "se saque do mapa industrial unha provincia como é a de Lugo", debido a que, segundo indicou, "non se reforza en ningún punto, en ningunha zona para o consumo industrial".

"É a única provincia que non sae reforzada e está condenada e sacada do mapa industrial para os próximos anos", remarcou, para garantir que "o Goberno de Galicia vai seguir loitando para que Lugo poida ter un futuro económico e industrial".

Lorenzana, ademais, acusou de "irresponsabilidade" o secretario xeral do PSdeG e deputado por Lugo, José Ramón Gómez Besteiro, por avanzar na xornada do luns a exclusión do proxecto de Altri dos reforzos enerxéticos.

"Chámame poderosamente a atención que estivese contento de poder dicir que Lugo é a única provincia que non sae reforzada e por tanto que está condenada, sacada do mapa industrial para os próximos anos", censurou