A Xunta activa unha liña de axudas para rehabilitar vivendas en concellos de menos de 5.000 habitantes

A Xunta activou unha nova liña de axudas para a rehabilitación de vivendas en concellos de menos de 5.000 habitantes, con subvencións que poden acadar os 30.000 euros por inmoble.

A conselleira de Vivenda e Planificación de Infraestruturas explicou que a iniciativa busca revitalizar estes municipios e contribuír a asentar poboación no rural.

O Goberno galego destina a esta convocatoria un orzamento de 5 millóns de euros de carácter bianual, con fondos autonómicos pero a contía poderá ampliarse se a demanda supera o crédito inicial.

As axudas cubrirán ata o 75 % do custo das obras de rehabilitación.

O prazo de solicitudes abre o 21 de xaneiro

A convocatoria publícase este martes no Diario Oficial de Galicia. O prazo para presentar solicitudes abrirá o vindeiro 21 de xaneiro.

As peticións poderán rexistrarse ata o 1 de setembro ou ata que se esgote o crédito dispoñible.

Esta nova liña súmase a outras medidas da Xunta para impulsar o acceso á vivenda.

Entre elas figuran as axudas para a compra de vivendas en concellos de menos de 10.000 habitantes, con importes máis elevados para persoas menores de 36 anos.

Inclúense tamén subvencións para rehabilitar vivendas de titularidade municipal.

A Xunta mantén, ademais, axudas para actuacións en concellos con Áreas de Rehabilitación Integral.

Outras liñas apoian a reforma de vivendas situadas no Camiño de Santiago e na Ribeira Sacra.

O Goberno galego puxo en marcha tamén o programa Fogar Vivo, que ofrece axudas de ata 16.000 euros para recuperar vivendas baleiras.