O Parlamento inicia a tramitación para pedir por cuarta vez o traspaso da AP-9

O Parlamento galego haprobou por unanimidade tomar en consideración a proposición de lei para remitir ao Congreso dos Deputados para a transferencia a Galicia da titularidade e as competencias da AP-9.

Trátase da cuarta vez que o Parlamento aproba un texto destas características nos últimos anos, xa que os anteriores por distintos motivos, ou non chegaron a debaterse no Congreso ou decaeron ao ser disoltas as Cortes para celebrar eleccións.

Na sesión deste martes, primeiro pleno ordinario do novo período de sesións tras o parón estival, os deputados galegos debatiron e votaron dous textos similares, un presentado polo BNG -desestimado cos votos do PPdeG, aínda que si logrou o apoio do PSdeG- e outro do grupo maioritario, o popular, que foi a iniciativa finalmente aprobada por unanimidade.

Antes, case unha hora de debate de ambos os textos de forma acumulada, na que uns e outros se intercambiaron reproches e culpas.

A primeira en defender a súa proposta e en cargar contra os seus rivais políticos foi Ana Pontón, a portavoz nacional do BNG, que tachou a PP e a PSOE de ser "cómplices" e de estar "a favor de Audasa"ao longo dos anos.

Pontón incidiu en que foron gobernos en Madrid encabezados por estes partidos os que nun momento ou outro aprobaron a ampliación da concesión desta autoestrada e alternáronse en "a estafa" que sofren todos os galegos ao ter que afrontar peaxes "abusivas" nunha vía que leva anos "amortizada" e na que haberá que seguir pagando ata 2048 "a unha empresa, ademais, privada" xestionada por "fondos voitre".

Aínda que situou no centro das súas críticas tanto ao PP como ao PSOE cargou con especial dureza contra a formación que agora lidera Alberto Núñez Feijóo, xa que foi cun goberno presidido por José María Aznar na Moncloa e con el como conselleiro de Infraestruturas cando se aprobou a última concesión, por 25 anos máis -ata 2048-, e posteriormente cando se privatizou a compañía.

Ademais, continuou, este partido, con Ana Pastor de presidenta das Cortes e Mariano Rajoy como presidente do Goberno, foi o responsable de "vetar" o debate no Congreso do texto aprobado por unanimidade no Parlamento galego.

A líder do BNG asegurou que o seu partido é o único que defende unha autoestrada "galega e libre de peaxes", algo que na súa opinión só se logrará cando a comunidade teña "unha presidenta coas mans libres".

José Manuel Balseiro, portavoz do PP no debate, censurou as críticas da deputada nacionalista e afirmou que a traxectoria do BNG demostra, na súa opinión, que este partido sempre elixiu apoiar a Pedro Sánchez aínda que fose en contra dos intereses de Galicia, tamén neste tema.

Segundo Balseiro, a proposta do seu partido mellora o texto do BNG en canto a clarificar distintas demandas sobre financiamento, xa que debería ser o Estado con fondos públicos o que asuma o mantemento da vía, garanta e amplíe o pago das bonificacións das peaxes, encárguese das obras e os compromisos pendentes e transfira á comunidade os fondos necesarios para a correcta xestión.

O deputado do PPdeG reprochou ao PSOE e aos partidos que apoiaron a investidura de Sánchez na anterior lexislatura a dilación na tramitación da lei no Congreso, xa que primeiro estivo nun caixón durante moitos meses e posteriormente obstaculizouse con emendas que, en realidade, dixo, desnaturalizaban o texto aprobado en Galicia.

A deputada socialista Patricia Otero afirmou que o seu partido continúa "onde sempre estivo" respecto á transferencia á comunidade da AP-9 e por iso apoiou tanto o texto do BNG como o do PPdeG, aínda que mostrou a súa estrañeza polas críticas de Ana Pontón e por equiparar ao seu partido co PP neste tema e "faltando á verdade", ademais.

Unha vez realizada a votación a conselleira de Infraestruturas e Mobilidade, Ethel Vázquez, opinou nun corredor anexo á área de goberno sobre o texto aprobado no Parlamento. Ao seu lado estaban os deputados do PPdeG José Manuel Balseiro, que acababa de intervir no pleno do hemiciclo autonómico, e Celso Delgado, que foi relator da lei tramitada no Congreso na pasada lexislatura.

Vázquez censurou "o bloqueo" do PSOE na lexislatura pasada para tramitar a lei aprobada por unanimidade en Galicia e mesmo asegurou que os socialistas pretenderon "desviar" o seu contido.

A conselleira defendeu a capacidade da comunidade para xestionar directamente a AP-9 e confiou en que proximamente se consiga a "demanda histórica" e se logre a transferencia.