Ángela Rodríguez pide desculpas polo ton sobre a rebaixa de condenas a violadores
A vicepresidenta primeira, Nadia Calviño, pídelle unha rectificación
A secretaria de Estado de Igualdade pediu, nunha entrevista concedida á TVG, perdón tras a polémica provocada por unha intervención súa nun foro de Podemos. "Pido todas as desculpas que sexan precisas á xente que non lle poida gustar este ton", asegurou Ángela Rodríguez, ao tempo que insiste en que non estaba frivolizando sobre a rebaixa de condenas a agresores sexuais.
A número dous do ministerio de Igualdade afirma que "en ningún caso faría mofa da situación dunha muller, dunha vítima" e apunta a "unha manipulación" da súa intervención. Na súa opinión, "as feministas estamos moi acostumadas a que o noso traballo quede reducido moitas veces a estes boatos".
As explicacións non convencen o PP, que segue pedindo o seu cesamento. Elías Bendodo, coordinador xeral do PP, cre que o presidente do Goberno "vai tarde" en pedirlle a súa dimisión e "en modificar esta lei tan daniña para miles de mulleres".
A secretaria de Estado de Igualdade estivo hoxe na Estrada, nunhas xornadas sobre diversidade sexual.A ese acto cancelou a súa asistencia a secretaria xeral de Igualdade da Xunta, Susana López Abella. Comunicouno nunha rede social, explicando que "o seu sentido da xustiza é incompatible con mofarse da rebaixa das penas a delincuentes sexuais". López Abella pedía tamén o cesamento de Ángela Rodríguez.
Hoxe non estarei na Estrada na inauguración dunha xornada á que tamén está invitada Ángela Rodríguez, secretaria de Estado de Igualdade. O meu sentido da xustiza é incompatible con mofarse da rebaixa das penas a delincuentes sexuais. Sánchez debe cesala. pic.twitter.com/vKiIDzkj5D
— Susana López Abella @abellsusana (@AbellSusana) January 13, 2023
Ángela Rodríguez conta co apoio de Podemos e da ministra de Igualdade, pero non co do PSOE. Dende o partido, a responsable de Igualdade, Andrea Fernández, cre que "debe rectificar" porque foron "palabras inapropiadas, que non estivo nada ben o que dixo".
Tamén a ala socialista do Goberno reclama unha rectificación. A vicepresidenta primeira do Goberno, Nadia Calviño, cre que "esas declaracións cualifícanse por si mesmas e teñen que ser rectificadas canto antes", pero evita pronunciarse sobre un eventual cesamento da secretaria de Estado.
