Mouliaá di nos seus audios que cre que non houbo delito de Errejón, pero si abuso de poder

A actriz Elisa Mouliaá admite nun audio enviado á dona do piso onde se celebrou unha festa na que Íñigo Errejón presuntamente a agrediu sexualmente que non cre que o exdirixente político cometese un delito, pero considera que fixo "abuso de poder e se aproveitaba da situación".

Estes audios foron incorporados á causa pola Policía Nacional, que recentemente enviou ao Xulgado de Instrución número 47 de Madrid un oficio co contido do móbil de Mouliaá, incluíndo mensaxes con tres coñecidos entre 2021 e 2025.

Conversas e contradicións

Nas gravacións, de febreiro e marzo de 2025, cando Mouliaá e a dona do piso xa non eran amigas, a actriz relata a súa versión do ocorrido e insiste en que non denuncia por considerar que fose un delito: "Eu tampouco creo que sexa un delito", lle di á súa interlocutora.

Porén, asegura que sentiu a obriga de contar o que pasou tras apareceren "miles de denuncias anónimas" en outubro de 2024, momento no que Errejón dimitiu. A actriz matiza que aínda hoxe pensa que "non era un delito", pero que "estamos demasiado acostumadas aos babosos" e que "este tipo fixo abuso de poder".

Noutro audio pídelle á dona do piso que facilite a súa declaración xudicial: "Que se arquive por falta de rotundidade ante a xustiza, pero non por denuncia falsa", insiste, e pídelle que non diga cousas que poidan ir en contra da súa versión.

WhatsApps achegados á causa

Nas conversas de WhatsApp incorporadas ao procedemento, Mouliaá afirma que "acosar, invadir e exercer abuso de poder e poñerse a chupar os peitos dunha muller sen falar previamente de nada é invasión e si é delito", lembrando que está vixente a lei de só si é si.

A examiga responde que dirá ante o xuíz a verdade do que viu e que "non hai indicios de delito", lembrando que na festa a actriz comentou que Errejón a bicara sen que expresase molestia e que ao día seguinte lle dixo que mantiveran "unha boa conversa".

O informe policial e a situación xudicial

A Policía analizou dous informes periciais da defensa sobre conversas entre Errejón e Mouliaá, concluíndo que só se dispoñen de capturas de pantalla que "non permiten garantir a autenticidade do contido".

O xuíz Adolfo Carretero, que instrúe a causa, remitiu á Audiencia Provincial de Madrid o recurso presentado pola acusación popular contra a súa decisión de non imputar a Errejón por un posible delito de desobediencia por non entregar o seu móbil no xulgado.