A sardiña loce nos postos galegos a un prezo de entre cinco e seis euros a ducia
Aínda non se sabe se os barcos poderán ir pescar o domingo 22 para ter sardiña fresca
Nos postos do mercado da praza de Lugo, na Coruña, atopamos sardiña abondosa e saborosa.
"Cantas ducias queres?". "E está ben boa". "Eu aínda a comín onte, e está moi boa", comentan as vendedoras.
E, segundo as vendedoras, tamén a bo prezo.
"As deste tamaño... cinco, seis euros. Está moi ben".
Isto cando aínda faltan 18 días para a noite meiga. Pero para o San Xoán é imprevisible o prezo... e tamén se vai haber sardiña, porque, ao ser luns, os barcos terían que saír pescar o domingo e, polo momento, non contan co permiso pertinente.
"A ver se ao final lles deixan saír para traer sardiña fresca...", "Pero, vaia, na neveira aguanta". "O caso é ter sitio...".
Outra opción sería mercala antes e conxelala.
"Conxela ben. Pero a sardiña hai que tomala fresca...".
En canto ao prezo para entón...
"Depende se hai... se hai moita... Outros anos que houbo pouca chegou aos 18-20 euros".
Non se sabe a canto se venderá este manxar de San Xoán nos días da celebración, pero máis cara que agora, seguro.
