A prestación especial para afectados por incendios poderase cobrar ata catro meses
Créase unha nova prestación extraordinaria do SEPE por emerxencia extrema para os traballadores que non poidan acudir ao seu posto de traballo por cuestións relacionadas co incendio
Persoas desaloxadas por mor dos incendios en Talavera de la Reina, este martes (Juanma Jiménez/Europa Press)
A prestación extraordinaria para traballadores afectados polos incendios forestais que este martes aproba o Consello de Ministros ascenderá ao 70 % da base reguladora e poderase cobrar ata un máximo de catro meses.
Segundo explicaron fontes do Ministerio de Traballo, o real decreto lei de medidas urxentes de protección laboral e social fronte aos incendios regula medidas laborais para protexer os traballadores afectados polos incendios, tanto os actuais en Madrid, Ávila e Toledo como a outros que requiran medidas de protección civil ao longo da campaña de alto risco de 2026.
Entre estas medidas destaca a creación dunha nova prestación extraordinaria do SEPE por emerxencia extrema, de natureza contributiva, para os traballadores que non poidan acudir ao seu posto de traballo por cuestións relacionadas co incendio.
Estas causas poden ser a falta de acceso á vivenda por evacuacións ou restricións; que teñan que realizar tarefas de limpeza, traslado, recuperación de aveños ou reconstrución do domicilio; a necesidade de abordar trámites administrativos presenciais relacionados coa emerxencia ou atender o coidado de familiares afectados polos incendios.
A prestación, que non esixe un período mínimo de cotización, equivalerá ao 70 % da base reguladora, non consumirá cotizacións acumuladas para futuras prestacións por desemprego e terá unha duración máxima de catro meses.
Ademais, o decreto amplía o permiso por falecemento tanto para traballadores por conta allea como para socios de cooperativas en cinco días hábiles posteriores ao enterro cando a morte estea relacionada cos incendios.
Así mesmo, establece que calquera represalia empresarial contra os traballadores que exerzan estes dereitos será considerada nula, co obxectivo de evitar prexuízos laborais derivados da emerxencia.
As medidas entrarán en vigor tras a publicación do decreto no BOE, con efecto retroactivo desde o 23 de xullo, e aplicaranse mentres persistan as circunstancias que as xustifican, aínda que os incendios xa se extinguisen.
.png)
