A presidenta de México convida a Filipe VI a asistir ao Mundial de fútbol

A presidenta de México, Claudia Sheinbaum, convidou a Filipe VI a asistir ao Mundial de fútbol que se celebrará nese país, ademais de nos Estados Unidos e O Canadá, do 11 de xuño ao 19 de xullo, segundo informaron este mércores fontes da Casa Real.

Na súa carta dirixida ao rei, Sheinbaum expresa que este evento deportivo “constitúe unha conxuntura propicia para evocar a profundidade e o carácter singular dos vínculos entre México e España, forxados por unha irmandade histórica e sustentados no legado compartido da lingua, a cultura e a memoria colectiva que está ateigada de grandes mostras de solidariedade, empatía e unha visión humanista entre os nosos pobos”.

A Casa do Rei recibiu "de bo grao" esta invitación persoal ao monarca para visitar México no marco da "relación fraternal" de amizade entre os dous países, indicou a Zarzuela.

Unha invitación previa ás palabras do rei sobre a conquista

A carta de Sheinbaum ten data do 3 de febreiro e foi recibida o pasado 24 de febreiro no Palacio da Zarzuela.

É, por tanto, anterior ás declaracións que realizou o pasado luns Filipe VI recoñecendo que na conquista de América houbo "moito abuso" e que a presidenta mexicana valorou como un "xesto de achegamento" do xefe de Estado aínda que engadiu que "hai que seguir traballando" no proceso de recoñecemento histórico.