A presidenta da Comision Europea reúnese esta tarde con Trump para evitar a guerra comercial
O presidente norteamericano dixo que había un cincuenta por cento de posibilidades de acordo
Donald Trump agarda a reunión xogando ao golf nun campo escocés da súa propiedade, compatibilizando os seus intereses particulares cos que ten como presidente norteamericano.
O mandatario estadounidense chegou este venres a Escocia e, desde o primeiro momento, exhibiu o seu talante polémico, afirmando que Europa vai ao desastre se non para o que denominou como a doble invasión: a dos inmigrantes e a dos muiños de vento.
E neste contexto, despois dunha longa negociación, reúnese esta tarde o presidente Trump coa presidenta da Comisión Europea, Úrsula Von der Leyen, coa esperanza de chegar a un acordo arancelario equilibrado e estable, que evite a guerra comercial a partir do próximo un de agosto.
Polo que se sabe ata o momento, o posible acordo pasaría pola imposición dun imposto do quince por cento ás exportacións europeas, nun pacto similar ao que os Estados Unidos ven de asinar co Xapón.
Se non hai acordo, Trump imporá aranceis aos productos europeos a partir do un de agosto
Antes de viaxar a Europa, Trump dixo que hai un cincuenta por cento de posibilidades, quizais menos, de chegar a un acordo coa Unión Europea. O dirixente norteamericano ameazou con aranceis do 30 por cento de todos os produtos europeos senón hai acordo.
A Unión Europea tamén ten listas fortes sancións aos productos norteamericanos
A Unión Europea estará representada na xuntanza pola presidenta de Comisión, Ürsula Von der Leyen, e o comisario de Comercio, Olof Gill. Os representantes da Unión confían nun acordo que evite a previsible guerra comercial cos Estados Unidos a partir do un de agosto, pero, se non hai acordo, Europa adoptaría sancións de mais de 93.000 millóns de euros contra os productos norteamericanos a partir do sete de agosto.
