A policía británica investigará tamén o expríncipe Andrés por conduta sexual indebida

A Policía británica fixo este venres un chamamento público para solicitar información sobre a investigación aberta ao expríncipe Andrés por presunta conduta indebida en cargo público, ao indicar que as pescudas abarcan tamén posibles casos de conduta sexual indebida.

"O delito de conduta indebida en cargo público pode adoptar diferentes formas, o que converte esta investigación nun proceso complexo", sinalou nun comunicado o subdirector xefe da TVP, Oliver Wright.

Segundo a definición legal británica, ese delito pode incluír desde corrupción, abuso de posición ou neglixencia deliberada no exercicio de funcións públicas ata conduta sexual indebida, conflitos de interese, fraude ou actuacións destinadas a obter beneficio privado.

Wright pediu que calquera persoa con información relevante se poña en contacto coas autoridades e asegurou que "un equipo de detectives con gran experiencia traballa meticulosamente sobre unha cantidade significativa de información recibida do público e doutras fontes".

O segundo fillo home da defunta Isabel II foi detido en febreiro e posteriormente posto en liberdade mentres é investigado como sospeitoso de conduta indebida cando era representante comercial do Reino Unido.

Segundo os arquivos Epstein difundidos o ano pasado nos Estados Unidos, o antigo duque de York puido remitir información confidencial do Goberno británico ao pederasta estadounidense e millonario empresario Jeffrey Epstein, falecido en prisión en 2019 á espera de xuízo por tráfico de menores.

Ademais, Andrés, sobre o que existen numerosas fotografías xunto a Epstein e mulleres novas, foi acusado pola estadounidense Virginia Giuffre de abusar sexualmente dela en tres ocasións cando era menor de idade, en 2001, con intermediación do magnate.

Aínda que o expríncipe nega todas as acusacións, alcanzou un acordo millonario extraxudicial en 2022 para poñer fin á demanda civil presentada nos EUA por Giuffre, quen morreu en abril de 2025 aos 41 anos.

A parte de pedir información no Reino Unido, a Policía británica solicitou formalmente ao Departamento de Xustiza estadounidense acceso ás versións orixinais dos expedientes sobre Epstein e están á espera de resposta.

O hoxe coñecido como Andrés Mountbatten-Windsor foi apartado da vida pública en 2019 tras saír á luz o alcance da súa amizade co delincuente convicto, pero as revelacións posteriores levaron o rei Carlos III a retirarlle todos os seus títulos oficiais o pasado outubro e a esixirlle que abandonase a súa residencia en Windsor.