Desde xaneiro as familias monoparentais pagarán menos impostos pola compra de vivenda usada en Galicia

O próximo 1 de xaneiro entrará en vigor en Galicia unha rebaixa do imposto de transmisións patrimoniais (ITP) para a compra de vivenda usada por parte de familias monoparentais, cuxo tipo baixará do 8% ao 3%, e mesmo será do 0% en municipios rurais con pouca poboación. Esta baixada de impostos non se aplicará na compra de vivenda nova, xa que esta operación tributa no IVE. 

O presidente da Xunta, Alfonso Rueda, destaca así o compromiso do Goberno galego coas familias monoparentais e lamenta que non exista unha normativa estatal que regule estes fogares de forma uniforme.

Tras reunirse coas asociacións Fagamos e Nais Solteiras por Elección, Rueda lembra que Galicia conta desde 2011 cun certificado oficial que acredita a condición de familia monoparental.

Esa circunstancia outorga a este tipo de fogares unha puntuación adicional á hora de acceder a escolas infantís e casas niño; protección preferente na vivenda autonómica ou descontos nas tarifas do comedor escolar e dos campamentos xuvenís que organiza o Goberno autonómico.