A OTAN prepárase para coordinar a axuda a Ucraína ante a posible volta de Trump
A OTAN prepárase para coordinar a axuda a Ucraína ante a posible volta de Trump
A proposta de Stoltenberg inclúe crear un fondo para Ucraína con 100.000 millóns de euros en cinco anos
Buscan que a axuda “sexa máis predicible a longo prazo e garantir unha repartición xusta da carga”
Os ministros de Exteriores da OTAN acordaron este mércores traballar para que a Alianza xogue un papel maior á hora de coordinar a asistencia e a formación para a seguridade de Ucraína, coa posibilidade de que o republicano Donald Trump volva á Casa Branca.
“Hoxe, os aliados acordaron avanzar na planificación para que a OTAN teña un papel maior na coordinación da asistencia de seguridade e o adestramento”, afirmou o secretario xeral da Alianza, Jens Stoltenberg, nunha conferencia de prensa tras a xuntanza dos ministros en Bruxelas.
Segundo afirmou a ministra de Exteriores belga, Hadja Lahbib, a proposta de Stoltenberg inclúe crear un fondo para Ucraína con 100.000 millóns de euros en cinco anos.
“Non podo entrar nos detalles das propostas pero van desenvolver un marco institucional máis robusto e duradeiro para apoiar a Ucraína”, explicou a ministra belga.
Actualmente, a coordinación da axuda militar internacional para Ucraína está centralizada nos Estados Unidos cun grupo de medio centenar de países coñecido como “grupo de Rammstein”.
“Agora estamos a debater como podemos establecer un marco da OTAN máis sólido e institucional ao redor disto" para que a axuda “sexa máis predicible a longo prazo e tamén para garantir unha repartición xusta da carga”.
Agora que os aliados empezaron a discutir a planificación, pode haber toma de decisións no cumio que celebrarán os líderes da OTAN no mes do xullo en Washington.
