A ópera Carmen abrirá a Temporada Lírica da Ópera da Coruña o próximo 5 de setembro

A inmensidade do touro de Osborne sobre o escenario dá conta da España que se retrata. Unha época xa pasada na que para comunicarse había que empregar cabinas telefónicas.

"Representa a paisaxe no sentido literal e tamén poético da palabra. A paisaxe da España dos anos 60 e os 70 do século XX, toda esa mentalidade e estilo de vida", sinala Lucía Estiárraga, directora de escena desta reposición da Carmen interpretada na ópera de Viena en 2012.

A versión de Calixto Bieito combina aire español, denuncia social, humor e, por suposto, drama. Unha montaxe que reúne a máis dun cento de artistas en escena. Moitos deles galegos.

É o caso das coruñesas Susana e Irene Zas, mezzosoprano que interpreta a 'Mercedes': "Esta Mercedes en concreto é nai e non se ve normalmente nestas óperas. É un matiz novo que se lle dá". Tamén Susana García, soprano que interpreta a 'Frasquita', considera que "é unha visión única do director de escena Calixto Bieito".

Na súa estrea, a Carmen de Bizot foi un escándalo. Corría o ano 1875. Pouco despois converteuse nun éxito. Pasaron 150 anos e continúa a ser unha das óperas máis representadas do mundo. Na Coruña poderá verse os días 5 e 7 de setembro.