A neve afecta doce estradas galegas e deixa parados 850 camións en Zamora
A circulación está restrinxida para vehículos pesados en tres vías da comunidade
Comeza a nevar por baixo dos 500 metros, en lugares como a cidade de Lugo
O bloqueo de mercadorías comeza a provocar desabastecemento nalgúns supermercados
Camións en Zamora. EFE/Mariam A. Montesinos (Directo: cámara web en Pedrafita do Cebreiro)
Centos de camións, máis de 850 segundo os cálculos da Garda Civil de Tráfico, permanecen embolsados por mor da neve en áreas de descanso das autovías A-52 (das Rías Baixas) e A-6 (do Noroeste) á entrada de Galicia, na provincia de Zamora.
A circulación está restrinxida para vehículos pesados en tres estradas galegas: na A-52 entre A Canda e Ábades; na N-525 entre A Canda e Fumaces; e na LU-633 en Pedrafita do Cebreiro.
Ademais, noutras 9 vías os camións teñen prohibido adiantar. Na provincia de Lugo: na A-6, en Pedrafita-A Portela e Noceda-Pedradreita; na N-6, en Espariz-El Castro; e na A-8 entre Barral de Cima e O Barral.
Na provincia de Ourense: na N-541, en Fontemoreiras-A Ermida; na OU-533, na Gudiña-Vilaseco; e na OU-536 entre Outeiro do Cabo-San Xulián e Castromao-Cerdeira.
Na provincia de Pontevedra: na N-525 na Corna-As Maceiras; na AG-53, no Candedo-Moire e Amear-O Candedo; na N-541, en Vilapouca-A Ermida; na PO-533 entre Rodelas-Aciveiro; e na PO-534 na Pallota-Berrozo.
En canto ao tráfico de turismos, levantouse a obriga de circular con cadeas pola A-52 dende Pobra de Seabra ata o linde con Galicia, establecida dende o venres pola mañá.
Entre as incidencias máis graves, cómpre salientar o cruzamento dun camión de transporte postal que patinou e quedou atravesado na A-52 preto do límite coa provincia de Ourense.
Preocupación
Na área de Quintanilla de Urz, na A-52, permanecen uns catrocentos camións parados que se dirixían a Galicia. O ambiente é de preocupación porque moitos transportan produtos perecedoiros.
Un dos condutores, retido dende as sete da mañá con dous bloques de pedra que van para O Porriño, asegura que a Garda Civil deixará que continúen camiño se mellora a situación. En caso contrario, deberán agardar ata o domingo ou o luns.
Tamén hai vehículos pesados na área de servizo de Mombuey (Zamora).
Críticas do sector
As principais organizacións empresariais que representan o sector do transporte critican a prohibición decretada pola DXT para circular en máis de 3.000 quilómetros de autovías e estradas nacionais polo risco de nevadas.
A Confederación Española de Transporte de Mercadorías (CETM) considera que se impuxeron "sen a previsión necesaria", o que está a provocar que moitos camioneiros "queden tirados no medio das estradas" ao non ter alternativas reais para seguir circulando.
"Estamos indignados", asevera Diego Arias, presidente da Asociación de Transportistas AETRAM de Lugo, "porque é o día en que volvemos para casa e non o podemos facer".
O colectivo denuncia falla de "servizos básicos" e reclaman medidas de limpeza para os portos de montaña que lles permitan o paso cos seus vehículos.
Desabastecemento nalgúns supermercados
Estas restricións de tráfico, con centos de camións parados, empezan a ter consecuencias nos lugares de destino. A patronal dos supermercados, ASEDAS, asegura que xa están a provocar desabastecemento nalgúns establecementos comerciais.
Outras incidencias
Nas últimas horas, o 112 recibiu avisos de particulares con vehículos parados por mor da neve ou o xeo en vías como a A-52, en Cualedro; a OU-540, en Bande; a OU-533, na Gudiña, e noutras vías secundarias de Vilar de Barrio, Laza, A Pobra de Trives, Montederramo ou As Nogais.
En Parada de Ribeira, no concello de Xinzo de Limia, unha vintena de coches permanecían bloqueados pola neve á altura do quilómetro 3 da OU-1112 despois do mediodía.
Alto do Penedo do Galo, Viveiro (EFE/Eliseo Trigo)
