A néboa e o novo sistema de aproximacións provocan desvíos no aeroporto da Coruña

A néboa provocou varios desvíos no aeroporto da Coruña a outros aeródromos próximos, como o de Santiago e Vigo, tanto esta pasada noite como durante as primeiras horas deste xoves.

Concretamente, a néboa de advección -que se forma cando unha masa de aire cálido e húmido se despraza horizontalmente sobre unha superficie máis fría- foi a responsable destes desvíos.

Este mércores, o primeiro voo desviado era o Iberia procedente de Madrid, que debía aterrar na cidade herculina ao redor das 23:40 horas.

Xa este xoves, o voo de Vueling procedente de Barcelona, cuxa aterraxe estaba prevista ás 7:50 horas, acabou sendo desviado a Vigo.

A todo isto hai que sumar múltiples atrasos en despegamentos e aterraxes debido ás condicións de baixa visibilidade na pista.

O xestor aeroportuario Aena recoméndalles aos usuarios consultar a información dos voos antes de viaxaren. Nunha mensaxe publicada na rede social X, Aena informa de condicións de "meteoroloxía adversa".

📣 Meteorología adversa en el #Aeropuerto de A #Coruña.

📲 Te recomendamos consultar con tu aerolínea el estado de tu vuelo antes de desplazarte. pic.twitter.com/GpJyFF8EQX

— Aena (@aena) June 18, 2026

A plataforma Alvedro Vuela Más Alto culpa o novo protocolo de aproximación aérea

A plataforma Alvedro Vuela Más Alto considera, con todo, que as condicións meteorolóxicas actuais non son as que comprometen a operatividade do aeródromo coruñés, senón que culpa directamente ao novo protocolo de aproximación aérea implementado por Enaire, empresa pública encargada da xestión do control do tráfico aéreo en varios aeroportos españois.

"Son xa tres voos e seis operacións afectadas pola vergoñosa aplicación das manobras PNB na manobra ILS primaria á pista 21. O voo VLG1290 desde Barcelona e o IB463 desde Madrid de onte á noite e o VLG1292 desde Barcelona esta mañá, sufriron as consecuencias de deixar ao ILS inutilizado. Preto de 1.000 pasaxeiros víronse xa afectados por desvíos moi facilmente evitables e achacables ao 100 % ao xestor Enaire", explican nun comunicado e nas súas redes sociais.

No es un desvío producido por la meteorología. Es un desvío producido por la elevación de 23 pies de los mínimos que terminan siendo 300 al aplicarlos sobre la geometría del terreno por el problema que generan los mínimos espúreos. Toda la explicación: https://t.co/K1nT9CU2mi

— Aeropuerto A Coruña (@aeropuerto_LCG) June 17, 2026

"Esta plataforma leva semanas alertando das consecuencias reais da aplicación das mesmas. Trátase de desvíos non achacables ás malas condicións meteorolóxicas", afirman. 

Segundo o colectivo, a aplicación das novas aproximacións de precisión presentan "unha deficiencia técnica que compromete gravemente a operatividade e a seguridade en condicións de baixa visibilidade". Explican que o aumento das marxes de protección despraza e eleva o punto de decisión, que se convirte "nunha penalización operativa de máis de 300 pés adicionais". Tal ascenso dos limiares ocasiona, ao seu entender, "un aviso de mínimos falsos ou prematuros, obrigando ao piloto para ter que decidir moito antes debido a esta alerta temperá, obrigándolle a frustrar a aterraxe moito antes e finalmente desviar o voo".