A ex muller de Koldo García desmárcase das mensaxes en que falaban de "chistorras"

Patricia Uriz chegou ao Supremo cunha perruca e tapando a cara.  Durante a súa declaración, ocultouse a súa imaxe e só respondeu ás preguntas da avogada da súa exparella, Koldo García.

Negou as mensaxes recollidas nos informes da UCO, en que, supostamente, se refiren aos billetes como "chistorras", "leitugas" ou "folios".

"Non recoñezo eses whatsapps, non me encaixan na miña maneira de escribir nin de falar", dixo Patricia Uriz.

Contou que ela mesma e Koldo García pagaban por adiantado moitos gastos persoais de José Luis Ábalos, dende o tabaco ata a pensión alimenticia dun fillo seu, gasto que incomodaba a daquela muller do ministro.

"Á señora Carolina non lle facía moita graza e, para evitar discusións, facíamolo nós", explicou.

Di que "Ferraz era moi ríxido" cos reintegros de gastos a Ábalos

Uriz asegurou ademais que o PSOE era "moi ríxido" cos reintegros de gastos do seu entón parella e do exministro José Luis Ábalos. "Ferraz só pagaba se existían os tíckets e sempre reembolsaba en efectivo".

En canto aos gastos, dixo que podían ser comidas, gasolina, cafés e despois todo iso incluíao nunha folla de cálculo e, xunto cos 'tickets', reclamáballo ao partido, que era -subliñou- "moi ríxido" e sempre pedía esa xustificación. De feito, sinalou que algunha vez, cando lle axudaba a confeccionar esa documentación, a súa parella díxolle que, "se non había tícket, que nin o intentase".

Segundo explicou, o partido reintegraba eses gastos adiantados "sempre en efectivo", dentro dun sobre que adoitaba ir pechado e coa cantidade escrita, e nalgunha ocasión foi ela á sede, na rúa Ferraz de Madrid, recollelo se Ábalos ou o seu asesor non podían, porque á empregada que se encargaba de entregalo non lle gustaba "ter diñeiro no caixón".

Dixo que descoñece que cantidade era a que máis tarde pagaba o partido.

"Non facía control do que pagaba Ferraz. Eu creo que pagaba sobre o que lle presentaba Koldo, pero non o sei", sinalou a testemuña, que subliñou que eran "billetes de todo tipo".

Koldo manexaba varios sobres con gastos do ministro

Segundo a testemuña, que traballou como secretaria no Ministerio de Transportes, a súa exparella tamén adiantaba gastos de Ábalos imputables ao Ministerio, de xeito que "tiña dous sobres" para poder xestionar ese diñeiro porque "había que diferencialo moi ben" para saber logo a quen reclamalo. 

A súa avogada tratou de desvincular co seu interrogatorio o patrimonio da entón parella con supostas comisións ilegais por contratos de máscaras provenientes do empresario Aldama, quen Uriz dixo que nunca lles deu diñeiro en efectivo.

Uriz tamén intentou xustificar os máis de 20.000 euros en efectivo que atopou a Garda Civil nun armeiro ao rexistrar a súa casa cando arrincou o caso: 13.000 eran aforros seus que descoñecía Koldo, e uns 10.000 gardábaos a parella para "gastos" como "posibles reparacións". 

O suposto suborno do chalé

Tamén pasou polo Supremo un empresario da trama, Claudio Rivas. A Fiscalía cre que subornou a Ábalos con cartos e co alugueiro dun chalé.

Non quixo contestar a ningunha pregunta das partes porque tamén está imputado na Audiencia Nacional.

Si falou del outro empresario, Manuel Sallés. Contou que Rivas presumía polos bares dos seus negocios fraudulentos con Ábalos, conduta que, na súa opinión, respondía aos "efectos colateriais da droga e do alcol" .