A matrícula escolar poderase facer desde o móbil en Galicia; así será o proceso

O sistema educativo en Galicia contará cunha ferramenta para realizar a matrícula de forma dixital. A Axencia para a Modernización Tecnolóxica de Galicia (Amtega) foi a encargada de desenvolver este proceso, accesible a través de calquera navegador de Internet e adaptado para dispositivos móbiles.

Con todo, quen queira poderá realizar a matrícula de maneira presencial, como ata o de agora. No caso de infantil e primaria o prazo estará aberto entre o 20 e o 30 de xuño e o da ESO e Bacharelato, entre o 23 de xuño e o 7 de xullo.

A matrícula dixital realizarase desde a páxina web AdmisionAlumnado e existirá unha vía de acceso a partir dunha ligazón desde Abalar Móbil. Unha vez dentro, a identificación farase con Chave365 ou mediante un certificado dixital.

Nos próximos días, a Consellería enviará aos centros educativos e ás familias instrucións sobre este novo procedemento. No caso das familias de nova incorporación, recibirán a información a través dos centros escolares onde foron admitidos os seus fillos, debido a que aínda non están dentro do sistema Abalar.

Unha vez introducidos e autenticados os datos de identificación, o usuario poderá premer na icona de matrícula, no que xa aparecerán precargados os datos persoais dos pais ou titores e do alumnado, xa que a fase de matrícula é posterior á de admisión. Esta información poderán actualizala ou modificar en caso de erro.

Deste xeito, poden achegar datos que ata o de agora só podíanse trasladar presencialmente no portelo do centro, como a posibilidade de transporte escolar, o uso do servizo de comedor e a autorización de imaxe de alumnado. Ademais, o sistema permite a recollida de documentación, como a fotocopia do DNI ou da tarxeta sanitaria.

Facilitará igualmente a selección das materias para cursar, así como das optativas e dará mesmo a opción de ordenalas en orde de preferencia.

Este novo procedemento pretende aliviar a carga de traballo nos centros escolares, xa que "concentra moito tempo" e "xera estrés", segundo expresou o conselleiro de Educación, Román Rodríguez. Ademais, procura "facilitar a vida ás familias".