A líder opositora de Venezuela María Corina Machado, premio Nobel da Paz

A líder opositora de Venezuela María Corina Machado é a gañadora do Premio Nobel da Paz 2025 "polo seu incansable labor na promoción dos dereitos democráticos do pobo venezolano e pola súa loita por lograr unha transición xusta e pacífica da ditadura á democracia", anunciou este venres o Comité Nobel noruegués, con sede en Oslo.

O Premio Nobel da Paz 2025 outórgase a "unha valente e comprometida defensora da paz, a unha muller que mantén viva a chama da democracia no medio dunha crecente escuridade", dixo Jørgen Watne Frydnes, presidente do Comité Noruegués do Nobel, na lectura do ditame.

Machado "demostrou que as ferramentas da democracia son tamén as da paz", subliñou o comité, que agregou que a galardoada "encarna a esperanza dun futuro diferente, no que se protexan os dereitos fundamentais dos cidadáns e se escoiten as súas voces".

Como líder do movemento democrático en Venezuela Machado é "un dos exemplos máis extraordinarios de valentía civil en América Latina en tempos recentes", destacou o comité.A premiada foi "unha figura clave e unificadora nunha oposición política que no seu día estivo profundamente dividida, unha oposición que atopou un terreo común na esixencia de eleccións libres e un goberno representativo", engade.

Machado di que o Nobel da Paz é un logro e un recoñecemento para toda Venezuela

A líder opositora venezolana María Corina Machado cualificou a obtención do Nobel da Paz 2025 de "logro" e "recoñecemento" para todo o pobo venezolano.

"Este é un logro para toda a sociedade, eu só son unha persoa, non o merezo", afirmou Machado nunha conversación telefónica difundida pola fundación Nobel, na que cualificou o premio de "maior recoñecemento ao noso pobo".

O director do Instituto Nobel noruegués, Kristian Berg Harpviken, chamou minutos antes do anuncio do galardón, á 11.00 hora local, a Machado, que repetiu varias veces "Oh, Divos meu!" e dixo coa voz entrecortada: "Non teño palabras".

"Síntome honrada, atafegada e moi agradecida en nome do pobo de Venezuela", afirmou Machado.

O fallo do Comité Nobel noruegués resalta o seu "o seu incansable labor na promoción dos dereitos democráticos do pobo venezolano" e "a súa loita por lograr unha transición xusta e pacífica da ditadura á democracia", aínda que a líder opositora mostrouse cauta.

"Aínda non chegamos alí, estamos a traballar duro para logralo, estou segura de que gañaremos. Este é o recoñecemento máis grande para a nosa xente, que llo merece", afirmou.

No vídeo, de algo máis de catro minutos de duración, Harpviken pídelle a Machado esperar cinco minutos para propagar a noticia, cando se produza o anuncio oficial.

O Comité Nobel cre que é pronto para saber se Machado poderá viaxar a Oslo

O Comité Nobel noruegués espera que a opositora venezolana María Corina Machado poida viaxar a Oslo dentro de dous meses para recoller o premio da Paz, aínda que resaltou que é pronto para sabelo e que é necesario resolver antes unha cuestión de seguridade "seria".

"É demasiado pronto para dicilo. Sempre esperamos ter aos invitados connosco en Oslo, pero hai unha situación de seguridade seria que hai que resolver primeiro", dixo o líder do Comité Nobel noruegués.

Preguntado polo posible efecto da concesión do premio na situación de Machado, que reside en Venezuela, Frydnes mostrouse confiado en que sirva para impulsar a súa causa.

"É un dos dilemas máis difíciles nas discusións do comité cada ano con todos os candidatos, especialmente cando a persoa que recibe o premio vive oculta por serias ameazas á súa vida. Ela é moi activa en Venezuela, foino e serao. Cremos que este premio apoiará a súa causa, non a limitará", afirmou.

Frydnes sostivo que o Nobel da Paz para Machado "dá esperanza a todo un país" e resaltou que o galardón deste ano quere enviar unha mensaxe de aviso contra o retroceso da democracia no mundo e o avance do autoritarismo.

"Creo que me vai levar moito máis tempo crer o que acabo de escoitar", responde Machado en alusión á súa sorpresa por gañar o Nobel da Paz.

Moitos venezolanos recibiron o anuncio en Galicia: son a comunidade estranxeira que máis medra na nosa comunidade. E a maioría fala de satisfacción e de esperanza.