A inflación sobe dúas décimas, ata o 2,9 %, polos carburantes e a electricidade

A inflación subiu dúas décimas en setembro, ata o 2,9 % interanual, debido principalmente a que os prezos dos carburantes e da electricidade baixaron menos que no mesmo mes de 2024.

O Instituto Nacional de Estatística (INE) publicou este luns o dato adiantado do Índice de Prezos de Consumo (IPC) de setembro, que, de confirmarse, encadearía catro meses á alza, fóra de agosto, que se mantivo estable, desde o mínimo de maio (2 %).

En canto á inflación subxacente (a que exclúe os alimentos non elaborados e os produtos enerxéticos), a taxa de variación anual estimada baixou unha décima, ata o 2,3 %.

Os datos sitúanse en liña co esperado, segundo Economía

Na súa taxa mensual, os prezos de consumo descenderon un 0,4 % respecto a agosto, a maior baixada desde setembro do ano pasado, cando caeron un 0,6 %, segundo detalla o INE.

O ministro de Economía Carlos Cuerpo sinala que os datos se sitúan en liña co esperado e amosan unha continuación do progreso de moderación.

Confía en chegar ao obxectivo marcado polo Banco Central Europeo (BCE), que se sitúa ao redor do 2 %. "Se se segue cumprindo", afirma, "e os salarios continúan evolucionando, os españois van recuperar poder adquisitivo".

O dato definitivo coñecerémolo o vindeiro 15 de outubro.