A incidencia en España volve crecer dez puntos tras engadírense máis de 10.000 contaxios
Seis comunidades autónomas duplican o índice de risco de ocupación nas UCI
A transmisión do coronavirus en España segue a tendencia á alza dos últimos días, cunha nova suba de dez puntos na incidencia media, ata os 208 casos, e con máis de 10.000 contaxios en 24 horas.
O Ministerio de Sanidade rexistrou nas últimas 24 horas 10.271 novos casos. O martes da semana pasada rexistráronse 6.777 casos, ou sexa, que aumentaron ao redor dun 30 %.
Seis comunidades autónomas —Cataluña, Aragón, o País Vasco, a Comunidade Valenciana, a Comunidade de Madrid e Navarra— duplican o limiar de risco (5 %) nas súas unidades de coidados intensivos, cuxa media nacional é do 7,76 %. Do mesmo xeito que a incidencia a 14 días, tamén crece o indicador a sete días, que adianta a evolución da pandemia a curto prazo ao pasar de 113,8 a 118 casos.
O mes de novembro comezou cunha incidencia a 14 días de 49 casos, que se cuadruplicou con respecto a este martes, día 30, con 208 casos. Ao longo do mes notificáronse 147.216 contaxios en total, 629 falecementos (44 no último día), e a presión nas UCI pasou do 4,4 % ao 7,7 %.
