A Garda Civil e a Consellería de Sanidade localizan un almacén clandestino de produtos cárnicos en Santiago
A Garda Civil e a Consellería de Sanidade localizan un almacén clandestino de produtos cárnicos en Santiago
Os produtos almacenados estaban destinados á venda a empresas de hostalería
As condicións hixiénico-sanitarias do local e dalgúns dos alimentos almacenados eran moi deficientes
O Servizo de Protección da Natureza (Seprona) da Garda Civil da Coruña, nunha operación conxunta co Servizo de Control de Rochas Ambientades da Consellería de Sanidade da Xunta de Galicia, localizou e interveu un almacén clandestino de produtos cárnicos destinados á venda a empresas de hostalería en Santiago de Compostela.
A operación atópase en fase de explotación e resultou na investigación do seu propietario como presunto autor dun delito contra a saúde pública. A investigación iniciouse o pasado 11 de febreiro, tras ter coñecemento o Seprona da posible existencia dun almacén irregular de produtos alimenticios dirixidos ao sector hostaleiro.
Na inspección do local, realizada coa colaboración de técnicos do Servizo de Riscos Ambientais constatouse que o almacén carecía de inscrición no Rexistro Xeral Sanitario de Empresas Alimentarias e Alimentos. Ademais, verificáronse graves deficiencias hixiénico-sanitarias, incluíndo a presenza abundante de mofo, óxido e sucidade en paredes, chans, andeis, arcóns e cámaras frigoríficas.
Os gardas civís e inspectores comprobaron que se almacenaban centos de quilogramos de alimentos e produtos cárnicos en condicións deficientes, mesturándose produtos en bo estado con outros caducados e mesmo en estado de descomposición.
Durante a inspección, achouse instrumental para a elaboración de etiquetas personalizadas e a manipulación de datas de consumo, o que permitiría a posibilidade de modificar ou substituír as etiquetas orixinais dos produtos adquiridos a diferentes provedores.
Ante estas graves irregularidades, os inspectores da Consellería de Sanidade procederon á inmobilización e precinto do local e dos efectos atopados. Pola súa banda, a Garda Civil procedeu á investigación do propietario do almacén como presunto autor dun delito contra a saúde pública.
Esta actuación conxunta subliña o compromiso da Garda Civil e a Consellería de Sanidade na protección da saúde pública e a seguridade alimentaria, garantindo que os produtos que chegan aos consumidores cumpran cos estándares sanitarios esixidos.
