Os restos óseos de Abadín coinciden co perfil xenético de Enrique Bolívar
A análise pericial establece a súa correspondencia co ADN do octoxenario desaparecido en setembro de 2023
O autor confeso da súa morte, agora en prisión por un roubo, sostén que foi un "atropelo accidental"
Os restos óseos localizados pola Garda Civil este venres no lugar de Quendes, no concello de Abadín, coinciden co perfil xenético de Enrique Bolívar, o octoxenario desaparecido no barrio de Fontepresa en setembro de 2023.
Segundo informa o corpo armado, as mostras recuperadas en coordinación con médicos forenses do Instituto de Medicina Legal de Galicia remitíronse ao departamento de bioloxía do servizo de criminalística para a súa análise.
Como resultado, obtívose un perfil xenético único que se contrastou co ADN de referencia atribuído a Enrique Bolívar, acadado a partir de indicios biolóxicos recollidos no seu domicilio por parte da unidade orgánica de policía xudicial da Comandancia de Lugo.
O cotexo realizado determinou a coincidencia entre ambas as dúas mostras pero, polo momento, o informe ten carácter provisional.
Investigación aberta
Logo de tres días de procura, a Benemérita topou os restos óseos nunha zona do piñeiral de Quende, onde o principal sospeitoso da súa morte, Javier Montero, dixo que soterrara o corpo.
O investigado, que está a piques de abandonar o cárcere de Bonxe onde cumpre condena por un roubo, sostén que foi un "atropelo accidental". Polo momento, a investigación continúa aberta.
Este luns, o autor confeso da morte do ancián volverá declarar ante a xuíza instrutora do caso para completar o interrogatorio e decidir se decreta a súa prisión provisional. Será a partir das 9:30 horas nos Xulgados de Mondoñedo.
"Isto empeza aquí"
A letrada que representa á familia de Enrique Bolívar explicou que a aparición dos restos óseos do octoxenario non é o final para os seus achegados, que desconfían da versión do sospeitoso.
"Isto non se acaba (...) Isto empeza aquí" , dixo en declaracións a EFE.
Segundo declarou o sobriño neto do finado, Roberto Paz, pensan que o autor confeso pretende rebaixar condena coa súa versión.
"Igual que estamos convencidos de que non foi accidental. O feito de que queimase o seu coche tres horas despois de desaparecer Enrique, xa o di todo. Branco e en botella", afirmou á TVG.
A avogada quixo destacar o "labor brillante e superexhaustivo" das forzas de seguridade "nos últimos anos" e recoñeceu que a familia "está mal" pero asumiu a nova con "certa tranquilidade" e "con cautela".
Agora, precisou, trátase de "localizar a maior cantidade de ósos posible" e ver se "o labor da Garda Civil" permite determinar as circunstancias da morte do ancián.
"Estamos en terra de ninguén e temos que deixar que os investigadores fagan o seu labor", sostivo.
Paula Salvador asegurou que as partes "tiveron coñecemento" dos detalles relativos á investigación da Garda Civil "o luns por tarde", cando se lle notificou ao sospeitoso, xa que estaba baixo segredo de sumario.
