Deteñen o autor de dous atracos en bancos de Catoira e Meis, nos que roubou máis de 20.000 euros
Impútanlle cinco delitos: dous de roubo con violencia e intimidación con arma de fogo, dúas de teneza ilícita de armas e un contra a seguridade viaria por conducir sen obter o permiso
Foi posto á disposición da Sección Civil e de Instrución do Tribunal de Instancia de Vilagarcía de Arousa Praza nº 2
A Garda Civil detivo un home de 45 anos, veciño de Vilagarcía, como presunto autor de dous atracos a man a armada de bancos en Catoira e Meis en que roubou uns 21.000 euros. Nun comunicado, a Garda Civil informa de que axentes procederon á detención o pasado mércores deste individuo ao que se lle imputan cinco delitos: dous de roubo con violencia e intimidación con arma de fogo, dúas de tenencia ilícita de armas e un contra a seguridade viaria por conducir sen obter o permiso.
O pasado 2 de setembro, o sospeitoso perpetrou un primeiro atraco nunha entidade bancaria en Catoira. Tras ameazar os presentes cunha arma de fogo, logrou facerse cun botín de máis de 18.000 euros en efectivo e fuxíu do lugar a bordo dunha motocicleta. Por mor das pescudas e da análise de probas do Equipo de Policía Xudicial da Garda Civil de Cambados, os investigadores lograron identificar plenamente ao presunto autor.
Segundo atraco
Ao non poder ser localizado nun primeiro momento, emitiuse unha sinalización policial para a súa detención. Dúas semanas despois, na mañá do pasado mércores, 16 de setembro, cometeuse un segundo atraco baixo o mesmo procedemento nunha sucursal de Mosteiro, en Meis, onde o asaltante subtraeu máis de 3.000 euros en metálico antes de fuxir.
Apenas unhas horas despois deste segundo golpe, axentes da Policía Nacional de Vilagarcía de Arousa avistaron ao sospeitoso dentro da súa demarcación territorial e informaron de inmediato os investigadores.
Así, estableceuse de forma urxente un dispositivo de cerco e localización integrado polos axentes investigadores de Policía Xudicial da Garda Civil de Cambados, efectivos de Seguridade Cidadá do mesmo posto e patrullas da Policía Nacional de Vilagarcía.
A coordinación entre ambos os corpos permitiu a interceptar a este home en menos dunha hora desde o seu avistamento. O detido, xunto coas dilixencias, foi posto á disposición da Sección Civil e de Instrución do Tribunal de Instancia de Vilagarcía de Arousa Praza nº 2.
