A Fiscalía abre dilixencias e ofrece a Hermoso a posibilidade de denunciar a Rubiales por agresión sexual
A Fiscalía abre dilixencias e ofrece a Hermoso a posibilidade de denunciar a Rubiales por agresión sexual
A Fiscalía abre dilixencias e ofrece a Hermoso a posibilidade de denunciar a Rubiales por agresión sexual
A Fiscalía da Audiencia Nacional abre "dilixencias de investigación" tras as denuncias presentadas contra Luís Rubiales, presidente suspendido da Real Federación Española de Fútbol (RFEF), e ofreceu á xogadora a posibilidade de denuncialo por un delito de agresión sexual.
O ministerio público non dubida de que, á vista das declaracións da futbolista, o bico na boca que Rubiales lle deu na entrega de medallas do mundial en Sídney "non foi consentido" e por iso ditou un decreto en que incoa dilixencias para "levar a cabo a investigación do feitos obxecto de denuncia".
En concreto, o que fai é dirixirse á xogadora para "informala dos seus dereitos como vítima dun presunto delito de agresión sexual" e dálle a posibilidade de que, nun prazo de 15 días, se poña en contacto coa Fiscalía.
Con todo, segundo aclaran fontes xurídicas, "non se iniciou aínda o proceso xudicial", senón que o caso está "aínda en ámbito preprocesual" e que o que fixo a Fiscalía é "ofrecer á xogadora a posibilidade de formalizar a súa denuncia pública".
A Fiscalía cre que os feitos denunciados -o bico que Rubiales deu o pasado 20 de agosto na boca a Jenni Hermoso mentres agarraba "coas dúas mans a cabeza da xogadora"-, poderían ser constitutivos dun delito de agresión sexual e subliña nunha nota de prensa a "importante repercusión pública nos medios de comunicación a nivel interno e internacional" que está a ter.
O decreto, asinado pola tenente fiscal da Audiencia Nacional, Marta Durántez, lembra así mesmo que a circular da Fiscalía Xeral do Estado sobre os criterios de actuación tras a reforma dos delitos contra a liberdade sexual na coñecida como lei do só si é si incluía entre os actos "merecedores de reproche penal" os bicos na boca, segundo varias sentenzas.
E precisa que, segundo o Código penal, nos delitos de "agresións, acoso ou abusos sexuais, será precisa denuncia da persoa agraviada, do seu representante legal ou querela do Ministerio Fiscal, que actuará ponderando os lexítimos intereses en presenza".
