A Fiscalía arquiva a investigación das comisións do AVE á Meca

A Fiscalía Anticorrupción arquivou a investigación sobre o presunto pago de comisións na obra do AVE á Meca, adxudicada en 2011 a un consorcio de doce empresas españolas, tras case catro anos de pescudas, que se abriron por mor do caso Villarejo.

Anticorrupción non  atopou indicios  dun delito de corrupción nas  transaccións  internacionais e acordou o peche das dilixencias preprocesuais abertas en 2018.

As dilixencias abríronse por mor do achado das  revelacións realizadas pola empresaria alemá Corinna Larsen, a que foi amiga íntima do rei Xoán Carlos, ao excomisario José Manuel Villarejo sobre ese contrato.

Despois de que o xuíz que investigou o caso Villarejo na Audiencia Nacional acordase darlle carpetazo á peza Carol,  ao entender que o rei era inviolable cando se produciu dita conversa entre Villarejo e Corinna en Londres en 2015, a Fiscalía Anticorrupción optou por seguir indagando nesa  adxudicación por se se producira a comisión dun delito de corrupción nas transaccións internacionais. Ao non atopalos, Anticorrupción acordou o sobresemento das dilixencias.