A F-111 Bonifaz, a fragata máis moderna da Armada española construída integramente en Ferrol

A fragata F-111 Bonifaz, primeira unidade da serie F-110, preséntase como a máis moderna da Armada española e marca o inicio dun programa construtivo clave para a Defensa.

O buque, construído no estaleiro público de Ferrol, mide 145 metros de eslora, 18,6 de manga e despraza máis de seis mil toneladas, cunha dotación inicial de 130 persoas.

Concibida para operacións de defensa antiaérea, antisubmarina e tamén de superficie, integra o sistema español Scomba co Aegis estadounidense.

Entre as súas innovacións destaca o chamado gran mastro, que concentra radares, equipos de guerra electrónica e sistemas de detección infravermella.

O radar, desenvolvido por Indra e Lockheed Martin, permitirá localizar mísiles balísticos e outras grandes ameazas aéreas.

Innovación tecnolóxica con xemelgo dixital

A Bonifaz é pioneira en incorporar un xemelgo dixital, unha réplica virtual do buque que recolle datos en tempo real para prever incidencias técnicas e mellorar a súa operatividade.

O nome da fragata rende homenaxe a un comerciante e mariño dos séculos XII e XIII, recoñecido como primeiro almirante de Castela e artífice da creación da Mariña Real de Castela.

Un programa estratéxico para Ferrol

O persoal do estaleiro ferrolán traballa na primeira botadura en seis anos, coa que se inicia un proxecto que se prolongará máis dunha década e que prevé xerar ata 9.000 empregos directos, indirectos e inducidos na contorna da cidade naval.

Para o desenvolvemento das fragatas, Navantia conta coa colaboración de 500 empresas.