A Executiva do PSdeG convocará o luns un Comité Nacional tras os casos de acoso

A Executiva do PSdeG reunirase o vindeiro luns, día 22 de decembro, co obxectivo de convocar ao Comité Nacional para abordar a situación política, nun contexto en que o partido fai fronte á crise interna xurdida tras as denuncias de acoso contra o que era presidente da Deputación de Lugo, José Tomé, e o alcalde de Barbadás, Xosé Carlos Valcárcel.

No encontro, tal e como sinalaron fontes socialistas, o secretario xeral do PSdeG, José Ramón Gómez Besteiro, informará á dirección sobre "distintos asuntos de actualidade política e orgánica", entre os que figura a convocatoria e celebración do Comité Nacional, o máximo órgano de decisión do partido entre congresos.

O partido indica que esta reunión enmárcase "no seguimento da actividade interna do partido e na análise do contexto político actual", que está marcado polas crises que atravesa o partido por mor dos casos de acoso.

A xestión da denuncia contra o aínda alcalde de Monforte, José Tomé, motivou que varios sectores lanzaran distintos manifestos críticos con Besteiro, o máis numeroso impulsado por mulleres do PSdeG como a alcaldesa da Coruña, Inés Rey, e que xa reuniu medio milleiro de apoios.

Desde a "lealdade ao partido", os asinantes -entre os que se atopan os expresidentes Emilio Pérez Touriño e Fernando González Laxe ou o exportavoz parlamentario do PSdeG Xoaquín Fernández Leiceaga e o alcalde de Ames (A Coruña), Blas García- defenden a necesidade de esclarecer os feitos, protexer as vítimas e preservar a integridade das institucións.

Por iso, reclaman "unha actuación firme, transparente e coherente" como a única que permitirá manter a confianza cidadá e demostrar que "non hai espazo para a impunidade nin para ningunha forma de violencia contra as mulleres".

As denuncias a Tomé e Valcárcel

Todo iso despois de que se coñecese que o Partido Socialista recibiu a través da canle interna antiacoso unha denuncia contra Tomé por suposto acoso sexual. Este feito motivou a dimisión do seu cargo como presidente da Deputación e a suspensión de militancia do político lucense, que non deixou as actas e continua como alcalde de Monforte e deputado provincial non adscrito.

Tras a saída de Tomé das filas socialistas e ante as críticas que acusaban á dirección de coñecer os feitos desde facía tempo, José Ramón Gómez Besteiro ofreceu o venres pasado unha comparecida na que trasladou que a dirección do partido e el mesmo tiveron coñecemento a través dunha "terceira persoa" deste caso no pasado mes de outubro, e que "animaron a denunciar". Con todo, xustificou non levar o caso á xustiza no feito de que, segundo o código penal, "ten que haber unha declaración de vontade da propia vítima".

Así, e no medio do ruído interno, o xefe de filas do PSdeG informou de que na tarde do luns o Partido Socialista recibiu, tamén a través da canle interna habilitada para iso, unha denuncia por suposto acoso laboral contra o rexedor de Barbadás, en represalia por denunciar unha situación de acoso sexual por parte dun exedil da localidade. Ademais, dixo que o PSdeG da provincia de Ourense atendeu a persoa denunciante, que confirmou tamén a denuncia a través dun documento.

Na comparecencia, o xefe de filas do PSdeG esixiu ao rexedor Xosé Carlos Valcárcel que entregase as súas actas como alcalde e deputado provincial, ademais de comunicar que se lle suspendería da militancia. Con todo, Valcárcel asegurou que non renunciaría ás súas actas e foi el o que pediu a dimisión de Besteiro, ao considerar que o seu caso respondía a unha operación para tratar de "eludir a súa responsabilidade" tras a xestión da denuncia contra Tomé.

Dáse o caso de que Valcárcel asinou outro dos manifestos xurdidos nos últimos días, no que se sostiña que "quen oculta, ampara, relativiza ou retarda as investigacións" por acoso "convértese en cómplice e, como tal, tamén debe asumir as súas responsabilidades e deixar todos os cargos".

O PSOE ourensán empraza o alcalde de Barbadás a entregar as súas actas no Concello e na Deputación

O PSOE provincial de Ourense emprazou o alcalde de Barbadás, Xosé Carlos Valcárcel, a asumir responsabilidades políticas e entregar as súas actas no concello e a Deputación tras coñecerse a denuncia dunha militante contra el por suposto acoso laboral despois de denunciar ser vítima de acoso sexual por parte dun exedil desta localidade, que o partido procedeu a expulsar.

Nunha conferncia de prensa ofrecida este mércores, o secretario xeral provincial, Álvaro Vila, trasladou que o propio Valcárcel presentou na tarde do martes a súa renuncia á militancia, pero considerou que debe "asumir as responsabilidades políticas" adecuadas á situación, nun contexto no que o partido ten "tolerancia cero" co acoso.

Ademais, Álvaro Vila informou de que o exconcelleiro, que dimitiu do cargo en 2024, seguía sendo militante tendo en conta que, conforme explicou, a dirección do partido non era coñecedora dos feitos que se lle atribúen. "A día de hoxe seguía como militante e abríuselle expediente para expulsalo inmediatamente do partido", sostivo.

O secretario provincial do PSOE ourensán narrou como o partido na provincia tivo coñecemento da denuncia contra o alcalde, a través da chamada o domingo da propia vítima. Ademais, explicou que a persoa informou de que comunicara os feitos a través da canle antiacoso habilitado do PSOE.

A gobernabilidade, "secundaria": o primeiro, "acompañar a vítima"

Preguntado sobre se ao partido lle preocupa a gobernabilidade no Concello, ante o pase a non adscrito do alcalde ao perder as siglas do PSOE, Álvaro Vila sostivo que "a situación do Goberno é secundaria" neste caso.

"O primeiro que debemos é preservar o percorrido desta denuncia que se formalizou e acompañar, neste caso, á vítima. Despois valorarase como pode afectar o Goberno", afirmou, para sinalar que aínda non se abordou tampouco co resto de edís da localidade como vai quedar a situación na corporación municipal.

Campaña das Xuventudes Socialistas

Neste contexto, as Xuventudes Socialistas de Galicia iniciaron unha campaña para pedir a convocatoria dun Comité Nacional do partido para abordar a situación.

"Seguimos defendendo que a mellor forma de frear o ruído, de dar explicacións transparentes e non estar pendentes da prensa amarela, é a través dun Comité Nacional", sinalou a organización xuvenil do PSdeG nunha mensaxe publicada no seu perfil da rede social X, en que informaba de que este mesmo mércores iniciaría unha recollida interna de firmas para este fin.