O alcalde de Barbadás non renuncia e pide a dimisión de Besteiro

O alcalde de Barbadás, Xosé Carlos Valcárcel Doval, descartou este martes dimitir como rexedor e tamén como deputado provincial, como lle esixe o PSOE, unha petición ante a cal pediu a baixa do partido.

Na tarde deste martes, o líder do PSOE galego, José Ramón Gómez Besteiro, compareceu de urxencia para pedir a Valcárcel as súas actas despois de que unha militante interpuxese unha denuncia na que esgrime que foi vítima de acoso laboral por parte deste rexedor como “represalia por denunciar acoso sexual dun concelleiro” hai xa meses.

En declaracións aos medios ás portas da sede provincial do PSOE de Ourense, Valcárcel denunciou o que entende que é unha operación na súa contra e, así as cousas, relacionou a petición de dimisión coa súa firma nun manifesto crítico coa cúpula galega no que, xunto a centenares de cargos e militantes socialistas, pide “responsabilidades” á dirección pola súa lenta actuación tras a denuncia por acoso sexual contra José Tomé.

De feito, o primeiro edil de Barbadás dixo que quen debería dimitir é o líder dos socialistas galegos, ao que suxeriu “que actúe en consecuencia e siga as recomendacións que lle pide aos demais”. Censurou que Besteiro lle esixa a dimisión sen darlle audiencia e cargou contra a súa xestión do caso do que era presidente da Deputación de Lugo, José Tomé, "actuar dous meses despois" de ter coñecemento dunha denuncia de acoso.

"Ante a neglixencia, dimisión", engadiu.

Valcárcel declarouse “indignado” polo que considera unha “indefensión patente” e defendeu a súa actuación desde que tivo coñecemento dunha denuncia por presunto acoso laboral criticando ademais que se decatou do caso de forma indirecta a través dun medio de comunicación.

"Aparentemente fálase dunha militante que me denuncia por acoso laboral e o que quero dicir é, en primeiro lugar, que con militantes non teño relación laboral. Deduzo que ten que ser unha persoa que ten unha proximidade política comigo, aínda que non me consta, traballadora non é", explicou o rexedor de Barbadás.

O alcalde, que asegurou que ten a conciencia tranquila, expresou o seu malestar pola credibilidade outorgada á denunciante e pola situación persoal xerada e avanzou que se reserva “todas as accións legais ante a indefensión e #ante unha denuncia" que considerou "falsa".

Preguntado pola gobernabilidade en Barbadás, apelou á súa traxectoria e trasladou que a súa intención é "seguir gobernando con honestidade, transparencia e diálogo".