Publicador de contidos

Publicador de contidos

A eurozona entrou en recesión técnica no primeiro trimestre

A eurozona entrou en recesión técnica no primeiro trimestre

Polonia liderou a clasificación cunha expansión do 3,8 %, por diante de Luxemburgo (2 %), Portugal (1,6 %)

G24.gal 08/06/2023 12:06

O PIB da eurozona entrou en recesión técnica no primeiros tres meses deste ano tras concatenar dous trimestres seguidos de contracción económica, do 0,1 % en ambos os casos, segundo os datos actualizados da oficina de estatística comunitaria Eurostat.

Polo tanto, a zona euro non puido finalmente evitar a recesión técnica que se daba por superada cos datos preliminares de Eurostat, pero que agora apuntan a unha redución do produto interior bruto (PIB) tamén no primeiro trimestre deste ano, que se explica principalmente polos datos de Alemaña.

A versións iniciais estimaban que o principal motor económico da eurozona rexistrara un crecemento nulo (0 %) entre xaneiro e marzo, pero a nova actualización apunta a unha contracción da economía alemá do 0,3 %, que se une á caída do 0,5 % do último trimestre de 2022.

En consecuencia, o dato correspondente ao PIB da eurozona cae da lixeira expansión do 0,1 % calculada nos datos preliminares a unha diminución do 0,1 % na actualización deste xoves, que se suma á contracción do mesmo calibre observada entre outubro e decembro do exercicio precedente.

Doutra banda, a actividade económica do conxunto da Unión Europea (UE) rexistrou un incremento do 0,1 % no primeiro trimestre de 2023, evitando, neste caso si, a recesión técnica tras un último trimestre de 2022 cun descenso do 0,2 %.

As economías de España e Italia as que máis medraron das catro maiores

En canto á análise do comportamento das catro maiores economías da Unión Europea, a de Italia foi a que máis creceu no primeiro trimestre deste ano (un 0,6 %), seguida de España (0,5 %) e Francia, datos que contrastan coa taxa decrecente de Alemaña.

Con respecto ao resto de estados membros, Polonia liderou a clasificación cunha expansión do 3,8%, por diante de Luxemburgo (2 %), Portugal (1,6 %) e Croacia (1,4 %), mentres que as maiores contraccións foron as observadas en Irlanda (-4,6 %), Lituania (-2,1 %), Países Baixos (-0,7 %) e Estonia (-0,6 %).

O estudo de cada compoñente do PIB lanza que o consumo final dos fogares caeu entre xaneiro e marzo deste ano tanto na eurozona como nos Vinte e sete un 0,3 %, mentres que o gasto público aumentou un 1,6 % nos países da moeda común e un 0,9 % en todo o bloque.

Así mesmo, o investimento (formación bruta do capital fixo) expandiuse un 0,6 % na zona euro e un 0,3 % na UE, as exportacións descenderon un 0,1 % en ambas as áreas e as importacións reducíronse un 1,3 % tamén nas dúas zonas xeográficas.

Publicidade
Publicidade
Publicidade
Publicidade