A defensa do condenado polo crime da luguesa Cristina Cabo pide que se xulgue por un delito de homicidio e non de asasinato
A defensa do condenado polo crime da luguesa Cristina Cabo pide que se xulgue por un delito de homicidio e non de asasinato
Na vista de apelación as acusacións manifestaron que a sentenza está debidamente motivada
Piden que se manteña a pena de 26 anos de cadea
O TSXG acolleu esta mañá a vista de apelación para revisar a condena de 26 anos de cadea do autor confeso de matar unha muller en Lugo, en 2022.
A vítima era Cristina Cabo, unha lucense de 42 anos, á que o xa condenado coñeceu a madrugada dos feitos e coa que acudiu ao seu domicilio para manteren relacións sexuais. No interior da vivenda, o home asestoulle 49 coiteladas e tras deixala gravemente ferida, marchou da vivenda cunha bicicleta e cun ordenador da vítima.
Por estes feitos, o xurado popular da Audiencia Provincial de Lugo declarou o home culpable dun delito de asasinato e outro de roubo. E foi condenado a un total de 26 anos de cadea.
Na vista de apelación, as acusacións, tanto a pública como a particular, pediron que se manteña a pena. Pola súa banda, a defensa solicitou que se revise e que os feitos se cualifiquen como un delito de homicidio e outro leve de furto.
Amais, alega que non se tiveron en conta as atenuantes de confesión, lexítima defensa, que actuou baixo os afectos do alcol e drogas e o seu trastorno mental.
Agora será a alto tribunal galego quen dite sentenza.
