A Coruña, capital do cómic con Viñetas desde o Atlántico

Viñetas desde o Atlántico é unha cita imperdible para os amates da banda deseñada, un punto de encontro para autores e lectores e un espazo cultural con propostas que conecta con outras disciplinas artísticas. Nos xardíns de Méndez Núñez da Coruña libreiros e editoriais presentaron as últimas novidades do sector.

O compostelán Pedro Segade asinou exemplares do seu quinto cómic, unha historia de atracos de bancos en que traballou man a man con Raúl Balen durante máis de dous anos.

"O cómic é un proceso de traballo longo e lento. Debuxas con toda a ilusión e cando ves que a xente pasa por aquí e quere mercar o teu cómic para ver o que fixeches é unha alegría", conta.

A obra está editada por Cartem Cómics, editorial salmantina dirixida por Iván Serrano que aposta polo talento dos creadores españois. 

"É importante para facer industria porque xera postos de traballo e negocio e isto é bo para todos", comenta.

O editor cualifica como moi bo o momento da industria da banda deseñada en España. Os cómics xa representan o dez por cento das vendas do mundo do libro no noso país. 

As bibliotecas municipais da Coruña estiveron presentes na feira cunha pequena escolma de todo o que atesouran.

"Facemos préstamos durante a feira e convidamos a xente a que veña visitarnos á biblioteca e se faga socia para levar libros gratis á casa", di Iván Serrano, bibliotecario no Fórum Metropolitano.

A rúa da Banda Deseñada reuniu librerías e editoriais de toda España ata o domingo, pero Viñetas desde o Atlántico non se despedirá da cidade ata ben entrado setembro, con tempo de sobra para visitar as exposicións do salón.