A retirada do tren descarrilado nas Neves permitirá restablecer este mércores a circulación entre Ourense e Vigo

A circulación entre Vigo e Ourense restablecerase este mércores despois de que finalizaran os traballos de retirada do tren de mercadorías que descarrilou nas Neves o 15 de novembro.

Fontes do Adif indican que a vía xa está en condicións de uso na zona do incidente, aínda que Renfe manterá este martes o plan alternativo de transporte.

O corte obrigou a modificar o servizo de catro trens diarios de Media Distancia entre Vigo Guixar e Ourense, dous por sentido.

Os viaxeiros realizaban por estrada o traxecto ata Arbo para continuar despois a viaxe en tren.

Os usuarios do tren de longa distancia a Barcelona, que cobre esa ruta varios días á semana, desprazábanse en autobús entre Ourense e Vigo, segundo a dirección do percorrido.