A China saca músculo nun desfile militar en que advirte do seu "imparable" avance

A China paralizou a súa capital este mércores para mostrar poderío armamentístico nun desfile militar no que o presidente chinés, Xi Jinping, flanqueado polos seus homólogos ruso e norcoreano, Vladímir Putin e Kim Jong-un, sentenciou que "o gran rexuvenecemento da nación chinesa é imparable".

A chegada dos tres mandatarios á praza de Tiananamen deu paso a 80 salvas que simbolizaban cada ano pasado desde o final da Segunda Guerra Mundial, previas ao izado da bandeira da República Popular e á solemne interpretación do seu himno nacional.

Xi, no centro, con Putin sentado á súa dereita e Kim á súa esquerda, advertiu de que "só cando os países se tratan como iguais e viven en harmonía pódese salvagardar a seguridade común, eliminar as causas da guerra e evitar que se repitan as traxedias da historia".

"O pobo chinés realizou unha gran contribución para salvar a civilización humana e defender a paz mundial -dixo-. Hoxe, a humanidade enfróntase de novo a eleccións: a paz ou a guerra, o diálogo ou a confrontación, a cooperación de beneficio mutuo ou os xogos de suma cero" e  "o gran rexuvenecemento da nación chinesa é imparable".

Nun acto coreografado ata o máis mínimo detalle e ante as escrutadoras miradas de Putin e Kim, no desfile houbo exhibición de tropas, armamento pesado e un sobrevoo de aeronaves, coa participación de veteranos da guerra contra Xapón e unidades modernas.

Drons equipados con intelixencia artificial, avións de alerta temperá de nova xeración, novos mísiles hipersónicos antibuque ou os sistemas de defensa antimísiles espertaron a ovación das mil persoas que asistiron ao evento.

O desfile conmemora a rendición formal de Xapón en 1945 e serviu e é interpretado como un acto de demostración de forza militar e diplomática nun contexto de tensións cos Estados Unidos e nun momento no que A China busca mostrarse como un socio confiable como alternativa a Occidente.