A Audiencia de Pontevedra absolve dous acusados de agresión sexual a menores

A sección cuarta da Audiencia Provincial de Pontevedra decretou a absolución de dous homes, que estaban acusados da comisión de delitos de violación e agresión sexual a dous menores que no momento dos feitos residían nun centro de menores, ao que "non regresaron cando estaba pautado".

Segundo informa o Tribunal Superior de Xustiza de Galicia (TSXG), tras a práctica das probas o tribunal conclúe que "non se acreditou máis aló de toda dúbida razoable a versión dos feitos presentada polas acusacións".

Na sentenza, explica que as declaracións das denunciantes foron "confusas", ao que engade que non se atoparon probas que corroborasen a existencia de coacción ou violencia por parte dos acusados.

Os maxistrados tamén sinalan na sentenza que os testemuños de terceiros indicaron que as menores acudiran "voluntariamente" á vivenda dos acusados e que non había indicios de que se cometeu delito algún.

"Non se pode dar en absoluto por probado o manifestado polas dúas menores. Lonxe diso, o que se infire claramente é que acudiron voluntariamente cos dous acusados, durmiron na casa con eles e marcharon cando quixeron, sendo que os dous acusados non realizaron acto ningún de coacción e mesmo manifestaron, eles ou as persoas que os acompañaban, actos dirixidos a preocuparse polo estado delas unha vez souberon que eran menores", indica a sentenza.

Contra a sentenza, que non é firme, cabe presentar recurso ante o TSXG.