A arte urbana transforma as fachadas de Fene co Perla Mural Fest
Diego As, Wedo Goás e David Barrera son os muralistas da terceira edición do festival
As fachadas grises de Fene convértense en grandes lenzos de cor co Perla Mural Fest. O festival pecha a súa terceira edición incorporando tres novos murais de gran formato á súa particular galería de arte, un imán para os visitantes.
As tonalidades grises tan recoñecibles na obra de Diego As contrastan co colorido das flores que brotan dun busto feminino. A obra do muralista lucense é a única finalizada.
O pontés Wedo Goás seguirá subido ao guindastre polo menos dous días máis. Artista multidisciplinar, iniciou a súa carreira como muralista en 2017.
"Sempre hai ese misterio. Vai chover? Vai fallar o guindastre? Que tal se me vai dar a pintura. É como entrar dentro dun cadro, é unha sensación moi bonita", conta.
A xente que pasa pola rúa ten a oportunidade de ver desde o inicio como transforma muros en grandes lenzos de cor. Ese privilexio é o que atrae cada ano centos de persoas ao festival.
"A xente ten a posibilidade de ver o proceso completo. Cando imos ao museo vemos o cadro terminado. Aquí podes ver como traballa cada artista, como se enfronta á pintura", explica Goás.
Moi preto do mural de Wedo Goás, tamén en proceso, está o do madrileño David Barreira, o terceiro desta edición do festival, unha aposta polo poder da arte urbana para cambiar perspectivas e alegrar as miradas.
